snilldaráætlanir

fara orðið oftast í vaskinn. Ég ætlaði að "krepputækla" þessa helgina en nei...lasin og treysti mér ekki til neins.

Ég ætlaði að vera búin að máta músina með gáfum mínum en nei....hún er klárari en ég ! hversu ömurlegt er það ? Og hún faldi sig bakvið það allra heilagasta á heimilinu..skápinn hans Himma míns. Í honum geymi ég myndir af Himma, gjafir og kort sem bárust okkur eftir andlát hans. Skápinn festum við við vegginn og það er ekkert hlaupið að því að komast bakvið hann.

Janúar hefur alltaf verið sá mánuður sem mér leiðist mest, hann er dimmur og hann er langur og ekkert skemmtilegt í augsýn. Svo kemur febrúar...hann er stuttur. Næsti er mars og þá eiga tvö barna minna afmæli og þá fer að styttast í vorið, sólina og sumarið.

Vinnustaðurinn minn er farinn að líkjast ættarmóti. Systa er farin að vinna þar líka, Solla og Jón eru þar sumar helgar og nú bættist nýjasti fjölskyldumeðlimurinn við, Siggi hans Steinars tók frumraun sína í akstrinum s.l. nótt. Amma passaði Libbu á meðan. Tíkinni finnst gaman að vera hérna, hún hittir þá vini sína Lappa og Kela og rökræðir við ömmu sína. Hún er ræðnasti hundur sem ég þekki hehe.

Ég hef verið að skreppa í heimsóknir niður á Landsspítala og hugleitt þegar ég geng upp á stofu sjúklingsins sparnaðaraðgerðir ráðherrans. Nú rukkar hann fyrir innlagnir. Mér sýnist að hann eigi ekkert eftir en að láta einhvern rukka heimsóknargesti um pening í hvert sinn sem einhver er heimsóttur. Það er nákvæmlega ekkert heilagt í þessu heilbrigðiskerfi ...

Mynd Halldórs í mogganum í dag er ljómandi. Fyrst skoðaði ég þessar myndir hálffúl, saknaði Sigmunds en Halldór teiknari er alveg ljómandi góður.

Lára Hanna skrifar ágætan pistil á síðuna sína og brýnir fólk til að mæta á mótmælafundina. Það er spurning hvort það skilar betri mætingu. Ég mun ekki hvetja fólk til að mæta fyrr en ég mæti sjálf, mér finnst svo álappalegt að ætlast til að aðrir mæti en ekki maður sjálfur.

Ég er ósátt við margt í þessu þjóðfélagi. Ég sé samt svosem engan tilgang með að pikka það hér inn á bloggsíðuna mína. Ég er Vog og þjáist af valkvíða og er ekki enn búin að finna alveg minn farveg í þessum málum. Það vill til að ég hef tíma, það er eina sem ég hef nóg af...eða þannig.

Til hvers er þetta líf ? Maður brasar við að eignast eitthvað drasl og eyðir æfinni í að borga það. Til hvers ? það er ekki eins og maður sé eilífur eða taki dótið með mér yfir hinumegin....til hvers er maður að berjast við þetta? Það eina sem ég sé í framtíð minni er að ég verð sett niður við hliðina á Himmanum mínum - í svolítilli brekku í Grafarvogskirkjugarði. Það er eina planið sem ég veit um og ég er sátt við það.

Ég sakna vinar míns Tigercoppers...

Hundlélegur bloggari

og ætlaði að bæta úr því, rakst á færslu sem truflaði mig og steinhætti við að skrifa tímamótafærslu.

Reyni aftur á morgun.

Góða nótt

Vissuð þið að það spáir grilljón stiga frosti eftir helgina ?

Já auðvitað vissuð þið það, þið eruð svo klár !

þrettándinn 2009

og ég ætla ekki að stressa mig á að taka niður jólin, tréð fer bara niður einhvern næstu daga en eitthvað af ljósunum fær bara að vera áfram uppi við.

En það sem ég ætlaði mér að skrifa um var allt annað.

Ég sat í vinnunni í gær og horfði á kvöldfréttir. Sýndar voru myndir frá Gaza. Foreldrar með látin börn sín, hræðileg sorg og örvænting. Ég varð svo reið að ég missti eiginlega alveg málið, að þetta skuli vera látið viðgangast. Þjóðarmorð í beinni augsýn alþjóðasamfélagsins ! Enn og aftur...Þeir ráðast á skóla, þeir skjóta sína eigin menn í misgripum, þeir eru í raun að skjóta á allt sem hreyfist !!!

Þetta er alveg hörmulegt.

Svo kom eitthvað kjaftæði úr hvíta húsinu...eitthvað væl um að Ísraelar ættu að gæta hófs ...bla bla bla...Sko þessi Gazaströnd er bara mjó ræma, með öllum landamærum lokuðum og hvert á þá að flýja ?

Þvílíkt og annað eins rugl.

Ég geri mér alveg grein fyrir að hér á Íslandi eigum við í miklum erfiðleikum. Á mínu heimili er sagt hvern mánuð um leið og næst að greiða reikningana...einn mánuður enn, einn mánuður enn...og svo reynum við að klóra saman aura í næsta gjalddaga.

Á Gaza bíða þeir hinsvegar eftir matargjöfum sameinuðu þjóðanna, þær koma auðvitað ekki við þessar aðstæður. Fólkið er svangt, hrakið og núna á að sprengja það í tætlur. Þið hafið séð myndir af þessum fallegu börnum ? Stóreygð með fallega brún augu...Það var áberandi í kvöldfréttum í gær að þessi sem voru undir læknishendi særð, þau skældu ekki einusinni. Þau horfðu bara með stóru augunum sínum og sögðu ekki neitt. Fólk kom gangandi inn í anddyri sjúkrahúsanna með látin börn sín, fólkið svo slegið að það grét ekki heldur. Úti fyrir vældu sjúkrabílar og einhverskonar viðvörunarflautur....

Í dag kveiki ég ljós fyrir íbúana á Gaza.

Já hérna

Annasamur dagur að baki sem innihélt vinnu, dýraspítalaheimsókn og lopakaup. Þetta er kannski ekki mikið fyrir venjulegt fólk en fyrir heimavant fólk þá er þetta dagskrá, kúpling !

Byrjuðum á lopanum, var með sérpöntun á mórauðri herrapeysu og vantaði efnið. Peysan er amk komin á prjónana.

Lappi fór til læknisins en hitti ekki sinn eigin dýralækni, hún var upptekin við að laga hvuttaframfót sem hafði brotnað. Við fyrirgáfum það auðvitað og fengum annan ágætan dýralækni.

Hún tók blóð úr framfæti ..Lappi æmti ekki né skrækti. Hann fékk lifrarkæfu úr dós í verðlaun og það var sko veisla, aldrei fengið svoleiðis fyrr ...vúhú...svo átti að sækja smá blóðdropa úr eyranu fyrir blóðsykurmælinguna..en smáæðin í eyranu fannst ekkert. Þá var tekið úr hinni framlöppinni....minn sagði enn ekkert en góndi með eftirvæntingarsvip upp í loftið eftir lifrarkæfunni.

Jenný Anna, þú ert fallin á dýralæknaprófinu en þú ert áreiðanlega betri fjármálaráðherra en þú veist hver.

Blóðsykur Lappa er í fínum málum.

Þá er eftir að mæla skjaldkirtilshormón og til þess þarf að senda blóð til rannsóknar erlendis...það kostar, það kostar helling.

Reikningurinn hjá Dýró hljóðaði upp á tæpar 25.000 krónur..*hóst*

Ég sagði við Lappa þegar við bökkuðum frá húsinu að hann þyrfti að klappa fyrir mig í staðinn. Hann lofaði því. Næst skruppum við í vinnuna og hann fékk að koma inn, hann elskar að koma í vinnuna mína. Honum finnst leigubílsstjórar BSR skemmtilegustu kallar í heiminum.

En ég sótti um tryggingu fyrir Kelann..það er of seint fyrir Lappann.

°°°°°°°°°°°°°°°°°°°°°°°°°°°°°

Mál málanna.

Bjarni endurgreiðir kássu að peningum til Glitnis....ég hefði viljað fá þennan pening í ríkissjóð frekar, það er hann (semsagt við ) sem greiðir ruglreikningana  fyrir þessa bankabéusa...

Ja svei attan bara. Ég hlustaði á Bjarna í Kastljósi og það sem ég náði að hlusta þá kenndi hann ekki neinum um...nema sér sjálfum.

Óvæntur félagsskapur, bræður á Austurvelli

Lappi svaf í stóra sófanum, hann er farinn að sofa ansi fast kallgreyið.

ég sat í mínu horni...klikk...klakk....*brölt* klikk .....klikk

Æi Keli, farðu að sofa ! segi ég. Kemst svo að því að mér finnst það ágæt hugmynd fyrir sjálfa mig og stend upp. Lít bakvið stóra sófann (þar sem tölvan stóra er ) og enginn Keli. Ég kalla í hann og hann kemur innan úr herbergi. Ég færi stólinn sem er við tölvuna svo Lappi labbi ekki á hann. Undan tölvunni hendist músin á æðislegum flótta ..hún hljóp eins og Keli og spólaði á parketinu..stóran sveig og fram í eldhús/þvottahús.

Ég kallaði í hundana inn, hringdi í Steinar og tilkynnti honum dagsskipun 3 janúar 2009. Músaveiðar góði minn, rífa innan úr þvottahúsveggnum til að finna gatið sem hún kemur inn um.

Músarkvikindið er orðið ansi kræft þegar það plantar sér bara inn í stofu til að glápa með manni á sjónvarpið

¨¨¨¨¨¨¨¨¨¨¨¨¨¨¨¨¨¨¨¨¨¨¨¨¨¨¨¨¨¨¨¨¨¨¨¨¨¨¨

Ég er vog. Ég er lengi að ákveða og þarf oft að velta hlutunum ansi mikið fyrir mér. Ég las hjá Skessu í gær, skoðaði myndband...hugsaði og svaf...las hjá Jennýu og skoðaði aftur þetta myndband.

Mennirnir sem ég taldi vera venjulega jóna með of mikið af bjór innbyrðis reynast vera "virtir" (set þar í gæsalappir, það hlýtur að eiga að skrifast í fortíð) menn í samfélaginu. Þeir eru greinilega á móti mótmælunum en brjóta svo sjálfir enn verr af sér. Ýmsir bloggarar eru með ítarlegri myndir af þessu framferði.

Mér finnst lítið leggjast fyrir fullorðinn karlmann þegar hann tekur upp á að slá til ungrar ókunnrar stúlku. Slíkur maður er í mínum huga ekki húsum hæfur. Hinn er ekki betri en virðist þó ekki alveg eins laus höndin.

Það er ekki sannfærandi að gagnrýna mótmæli og leggjast svo í svaðið sjálfur, endilangur....

ég mæli með að upp verði settur - flytja úr landi listi - og þessir tveir settir á hann.

Hörmuleg frétt

Móðirin segist hafa grátið síðan hún fékk fréttirnar, það skil ég vel. Tárin læddust niður kinnarnar á mér við að horfa á hana í fréttunum, móðursorgina sem ég þekki svo vel.

Hlekkur á fréttina

Afmæliskveðja og áramótaheit

Áramótaheitið : ég ætla að hafa það gott á árinu 09.

En afmæliskveðjuna fær minn hjartkæri,frábæri snilldar tengdasonur.........

JÓN BERG REYNISSON 

Til hamingju með afmælið elskulegur....

 

Ekkert trubbl í dag, takk

Ég komst auðvitað ekki að sofa á skikkanlegum tíma í gærkvöldi vegna óútskýranlegs hávaða . Hundar voru nokkuð spakir samt, Keli fékk eitthvað pilludót hjá dýró sem er betra en hann hefur fengið fram að þessu. Hann tók upp á að vilja horfa á flugeldana og gáði svo alltaf í kringum sig á gólfið á milli, ef ske kynni að ljósið væri komið inn handa honum að elta.

Algerlega óhræddur eða sko að mestu leyti.

Hann leit öðruhvoru til okkar og við sátum með steinrunnin pókerfeis við að horfa á sjónvarpið. Rosalega fannst mér skaupið frábært, þetta er eitt þeirra allra bestu !

Svo þurftum við að fara að sofa...pabbinn farinn að þrælast við að koma fólki milli staða og mamman átti að mæta eldsnemma í vitlausa vinnu....

Sjæse !

Hundar ákváðu sameiginlega að best væri að liggja sem næst mömmunni svo hún yrði ekki hrædd við hávaðann

Þetta eru almennilegustu hundar..

Afleiðingin 3 tíma svefn, mætti á réttum tíma í vinnuna, tel klukkutímana þar til ég kemst heim að L E G G J A mig og er hreint ekki til viðtals fyrr en 2. janúar 2009.

*héráaðveragrútsyfjaðurkall*

Úr stjórnborðinu mínu...ég vissi það..hehe

Birting ábyrgðarmanns

Nafnið sem þú gefur upp á blogginu þínu er ekki það sem sama og skráð er í Þjóðskrá. Í henni er skráð nafnið Ragnheiður Hilmarsdóttir. Vegna þeirra breytinga sem fyrirhugaðar eru um áramótin á blog.is getur þú því ekki bloggað um fréttir mbl.is nema að þetta nafn sé birt sem nafn ábyrgðarmanns á blogginu þínu. Auk þess birtast bloggfærslur ekki á forsíðu blog.is nema nafnið sér birt.

Ef ábyrgðarmaður er birtur, má sjá hann með því að smella á mynd af höfundi, sem alla jafna má finna í dálkinum Um höfundinn á bloggi viðkomandi.

Ábyrgðarmann má einnig birta og fela að vild efst á síðunni Stjórnborð --> Stillingar --> Um höfund.

-----------------------------------

Takk fyrir innlegg við síðustu færslu

í millihátíðafríi

og eyði tímanum í notalegheit, er að prjóna (myndir af nýjustu 3 peysunum í albúmi) og læra á að eiga blindan hvutta.

Áðan þegar ég setti stráka út að pissa þá þrammaði Lappi á borðstofustól, mig og hurðina á Kelabúri. Hann er greinilega að tapa þessari litlu skímu sem hann hafði. Núna tala ég meira við hann, hann skilur margt sem sagt er ..hann er samt ferlega kátur þrátt fyrir blinduna. Það dinglast rófan og maður sér hvað hann er sæll í sínu skinni.

Ég fékk jólaskraut á pakka sem mér fannst ekki lítið varið í...Sigga systir, yfirsnillingur, heklaði handa mér mús. Ég batt hana á lampann minn sem er hér alla daga við hliðina á mér.

Hérna er dýrið hehe

Já svo þætti mér vænt um að sleppa við msn samtöl við fólk sem neytt hefur hugbreytandi efna. Þrátt fyrir að ég beri mig nú mannalega þá er andlegt þrek alls ekki nógu gott og ég má takmarkað við áreiti og alls ekki "velmeintum" fyrirmælum um hvernig ég á og hvernig ég á ekki að syrgja hann Himma minn. Þann veg geng ég ein. Þrátt fyrir að margir séu sem sakna Himmans þá fer hver sína leið með það og þannig tel ég það eiga að vera.

Knús í boðinu