Yfirlit og tilhlökkun

Litið yfir liðna viku :

eyddi 2 fyrstu vikudögunum í að klára ákveðin verk á heimavelli svo þau þvældust ekki fyrir mér um helgina. Það tókst með sóma.

Miðvikudagur.

ég fór að keyra og lenti í tímahraki undir kvöldmat. Steinar var seinn heim með matinn sem ég átti að elda og tók upp á að bjóða tveimur herrum í mat. Shit...og ég átti að vera komin allt annað klukkan 20. Ég setti Íslandsmet í hraðeldun og áti og slapp þangað sem ég ætlaði mér. Eldhúsið var skilið eftir í tómum voða enda lagaði Steinar það bara áður en ég kom heim.

Fimmtudagur

Einhver andvaka truflaði mig og ég sofnaði allt of seint. Fór þar af leiðandi ekki á fætur fyrr en stuttu áður en ég átti að vera komin í Laugarneskirkju, skrapp eldsnöggt í vinnuna til Steinars og eyddi 2 tímum svo í kirkjunni. Alveg endurnærð á eftir. Ók svo aðeins og settist á símavakt um kvöldið eftir sumarfríið.

Föstudagur.

Hentist á fætur um 9, ætlaði ekki að láta nappa mig í bólinu þann daginn. Fór að keyra og fór í hádeginu með Öldu og Lalla á fund með læknateyminu. Alveg ágætar niðurstöður þar. Hélt svo áfram að keyra fram að kvöldmat. Þá passaði að koma sér á vaktina og henni lauk ekki fyrr en 2.30 um nóttina. Eftir smákrók á heimleið þá slapp ég í "sengen" og bara dó......

Laugardagur

Vaknaði ekki fyrr en klukkan hringdi í hádeginu. Dreif mig á fætur, ákveðin í að horfa á útför Sigurbjörns Einarssonar biskups áður en ég mætti í vinnuna. Falleg, látlaus athöfn og mér tókst að láta af einni gamalli kergju síðan ég var barn í Laugarnesi. Það er ágætt að losa sig við leiðindin smátt og smátt. Ég verð orðin helvíti góð sjötug. Leiðindalaus !

Fór í vinnuna 15.30 og átti fyrir höndum langa vakt fram á næsta morgun. Það gekk allt að óskum. Fólk eins og það er þegar það hefur hvolft í sig efni sem felur þeirra eigin persónu á bakvið móðu. Ekkert betra eða verra en vant er.

Fegnust í heimi þegar ég komst heim í rúm.

Sunnudagur

Hangi hér og dettur ekki skárra í hug en að blogga í dagbókarstíl. Hló mig máttlausa af bloggi Hnakkusar áðan, nenni ekki að smíða tengil en hann má m.a. finna hjá www.skessa.blog.is í tenglum. Færslan sem ég skemmti mér svona vel yfir heitir ; að fá Stein inn um gluggann.

Steinar skrapp út í rokið með prakkarana tvo og lofaði að halda sér vel í þá, hér er rok.

 

 

Nýr bloggvinur

Mitt í öllum asanum í liðinni viku þá eignaðist ég nýjan bloggvin. Ég rakst á færslu sem snerti mig inn að hjartarótum enda þekki ég málaflokkinn vel.

Þau mál sem hún fjallar um eru ekki á könnu hins opinbera. Við hinsvegar , almenningur, getum lagt okkar af mörkum til að breyta þeim með öðru viðhorfi. Mín skoðun er amk sú að rót eineltis sé sá skortur af umburðarlyndi sem við berum sjálf gegn hvert öðru. Barn sem heyrir sífellt lagt illt til annarra lærir dómhörku. En auðvitað geta verið aðrar ástæður fyrir að börn leggja önnur börn í einelti og níðast á þeim.

Síðan mín er stillt þannig að bloggvinir sjást ekki á henni en ég sé í innviðunum allar nýjar færslur.

Mig langar því að biðja ykkur að smella á bloggvináttu við Ingibjörgu Helgu Baldursdóttur og leggja ykkar af mörkum í umræðum um einelti. Við megum ekki missa fleiri ungmenni.

Ingibjörg Helga

Ef linkurinn að ofan virkar ekki.

(www.ingabaldurs.blog.is)

Mér er fullljóst að það er ekki sunnudagur en ég náði að eignast smástund útaf fyrir mig akkurat núna.

Hjalti minn varð fyrir slæmu einelti í skóla. Að taka á móti barni sínu blóðugu, niðurbrotnu og grátandi úr skólanum dag eftir dag er ofsalega erfitt. Það er líka erfitt að finnast maður standa aleinn í þeirri baráttu.

Gerendur eineltis eru ekki minna slasaðir á sálinni. Þeim þarf eflaust að hjálpa líka til að þeim líði ekki svo illa að það þurfi að bitna á öðrum. Margir foreldrar trúa ekki að börn þeirra eigi svo slæmar hliðar til.

Það er ekki lausn að henda fórnarlambinu úr skólanum. Það hefur ekki þrek til að byrja upp á nýtt.

Fyrirgefið ef þetta er sundurlaust. Ég hef ekki nógu góðan tíma núna til að semja pistil um einelti. Ég er samt að reyna og þið verðið að taka viljann fyrir verkið.

Hugsið um þessi mál

tímalaus . is

Bara ein skilaboð á dyrinni..

 

EKKI klukka mig ..plís....ég nenni þessu hreint ekki ....og það er bannað að móðgast þó ég nenni ekki.

Tala kannski við ykkur á sunnudag..lofa engu. Mikið að gera og enginn tími

Hvenær þá ?

Ég minni á samstarfssamning ríkisstjórnarinnar.

Ég minni á nám ljósmæðra

Ég minni á hlutverk ljósmæðra

Spurning mín er þessi :

Í góðæri mátti ekki hækka laun til að koma ekki af stað verðbólgu, það mátti ekki rugga bátnum.

Í verðbólgu má ekki hækka launin vegna þess að aurarnir eru "ekki til"

Hvenær má þá hækka launin ?

Þegar snjóar í neðra ?

Áfram ljósmæður !

Þeir sem eru aflögufærir

 Tekið af öðrum bloggum og birt til stuðnings.

 

3.9.2008 | 13:05

Soffía

 Veikindi og erfiðleikar gera sjaldnast boð á undan sér, það fær hún Soffía sem er kona á fertugsaldri að reyna þessa dagana,  hún þarf á hjálp okkar og fyrirbænum að halda

 Soffía greindist með æxli í höfði í byrjun Ágústmánaðar, Soffía og börn hennar þrjú voru í sumarbústað austur á landi. Og þá fór meinið að gera vart við sig með sjónsviðsskerðingu á vinstra auga, svima og ljósfælni. Þrátt fyrir öll þessi einkenni tókst henni til allrar guðs lukku að koma sér og börnunum heim í Hafnarfjörðinn heilu og höldnu. Þegar heim var komið fóru einkennin versnandi og á endanum fór Soffía uppá bráðavakt, þar sem gerðar voru rannsóknir og höfuðmynd tekin. Á þeirri mynd sáu læknarnir eitthvað sem krafðist frekari athugunar.  Daginn eftir var hún send í segulóm myndatöku, og þá kom í ljós að um æxli væri að ræða.  Aðeins viku eftir greiningu gekkst Soffía undir stóra aðgerð sem tók 7 tíma, aðgerðin gekk vel en einungis var hægt að fjarlægja helminginn af æxlinu.  Sýni sem tekin voru sýndu að næsta skref yrði geislameðferð og hefst hún að viku liðinni.  Soffía er enn með skert sjónsvið og ljós og minnsti hávaði fara illa í hana.  Soffía á 3 börn, 21 árs gamla dóttur og 2 syni 6 ára og 9 mánaða. Maður hennar og faðir barna hennar lést fyrir ári síðan í bílslysi og hét hann Jóhannes Örn.

Soffía dvelst enn á sjúkrahúsi og óvíst hvenær hún fær að fara heim, hún verður óvinnufær um óákveðinn tíma, hún hefur starfað sem húsvörður í blokk og búið í húsvarðaríbúðinni. Það er því ljóst að hún mun verða húsnæðislaus og atvinnulaus með börnin sín þrjú.

Stofnaður hefur verið reikningur til styrktar fjölskyldunni og er hann sem hér segir Reikningsnúmer: 0140-05-14321 kennitala: 161069-3619

á leið í bólið

eftir kvöld í "viðgerð". Notalegt og mér líður ágætlega.

En mér áskotnaðist nærri því óvart hundur í kvöld. Tík vinkonu minnar ákvað upp á eigin spýtur að vera bara kyrr í bílnum mínum og virtist ætla með mér heim. Ég var líka tekin í nefið þegar ég kom heim. Mínir hundar vildu sko vita hvað ég vildi upp á dekk með að hitta aðra hvutta en þá sjálfa, langsætustu hundana !

Ekki hafa áhyggjur þó lítið verði skrifað, það er hluti viðgerðarinnar.

Skipulag-skipulag

Það er oft talað um það hversu gott börn hafa af því að hafa um sig skýran ramma. Við sem lesum að staðaldri hjá henni Jónu Á erum alveg búin að átta okkur á að hennar drengur vill hafa sitt líf í föstum skorðum svo hann botni einfaldlega í því.

Um daginn sat ég hér og hugsaði til hryllings til vetrarins, mér varð kalt inn í öll bein og sorgmædd yfir því sem ég get ekki breytt. Heitasta óskin er auðvitað að fá hann Himma minn til baka en það er þó alls ekki hægt. Ég velti þessu nokkuð fyrir mér og fór hinar skrýtnustu krókaleiðir í huganum. Á endanum varð ég leið á þessari vitleysu og ákvað að hugsa málið í aðra átt. Hætta hreinlega að velta mér upp úr því að Himmi kæmi ekki til baka. Finna leið til að ramma inn lífið þannig að mér fyndist ég vera að áorka einhverju og væri til einhvers gagns. Nú ætla ég ekki að bjarga heiminum alein. Þetta er allt á miklu eigingjarnari nótum, ég ætla bara að koma sjálfri mér í eitthvað lag...starfhæft ástand að meira leyti en verið hefur. Í fyrra plumaði ég mig í vinnunni en ég gerði varla nokkuð meira...ss. ég var ekki eins starfhæf og ég vildi vera.

Ég finn t.d núna mikinn mun á mér, það er eitt og annað um að vera þessa vikuna og ég fagna því. Sumt er meira krefjandi en annað. Eða öllu heldur á eftir að taka meira á mig, það er allt í lagi. En nú er það samt þannig að ég ætla ekki að ofkeyra mig. Ég ætla að bæta smátt og smátt inn nýjum verkefnum...á mínum hraða.

Og eftir að ég var búin að ákveða þetta og ræða það ítarlega við Kela þá leið mér miklu betur. Mér fannst ég hafa eitthvað að gera og vera til einhvers gagns.

Eins og hvuttarnir mínir eru fínn félagsskapur og alveg merkilegt að horfa í brúnu augun, full trúnaðartrausts, þá ætla ég aðeins að víkka í vinahópnum. Finna mér vini sem eru ögn minna loðnir og það er ekki skilyrði að þeir séu brúneygðir.

Gott plan ?

Hætt að kvíða vetrinum...

Í gamla daga

var það versta sem fólk vissi að vera "aumingjagóður". Fólk skyldi sko bjarga sér hvað sem á gengi. Það hefði ekki átt upp á pallborðið að tala um alkóhólisma, þunglyndi eða aðrar raskanir. Þeir sem voru þjáðir af geðröskun voru vandlega faldir fyrir umheiminum.

Er þetta virkilega enn svona ?

Ég skora á ykkur, sem ekki gerðuð það áðan að horfa á Ísland í dag. Fársjúkur maður segir þar frá sínu lífi. Það var ekki hægt að horfa í bláu augun hans öðruvísi en að komast við.

Áðan fylltist ég þakklæti, þakklæti fyrir konur eins og Birnu Dís og Ásdísi sem láta sig varða um fólk, fólk sem hefur ekki haft fulla stjórn á sínu lífi.

-------------------------------------------------

Ég er annars að horfa á leik Blika og KR. Á þessu heimili er haldið með Blikum, bæði atkvæði heimilisins. Steinar hefur haldið með Blikum í 40 ár eða eitthvað. Og nú held ég með Blikum, styð minn mann sko

Umhugsun

Við sem hírumst í þessu bloggsamfélagi erum af öllum gerðum en flest notum við bloggið til að koma okkar sjónarmiðum áleiðis. Sumir eru rammpólitískir og feta vandlega flokkslínuna, eru með hina einu réttu "ríkisskoðun". Aðrir eru pólitískir þegar þeim dettur það í hug, þegar eitthvað hjartans mál dettur í umræðuna um borgarstjórn/ríkisstjórn. Þessir fylgja ekki flokkslínum.

Öll verðum við þó að fylgja okkar sannfæringu. Mikið hefur verið talað um Matthías á blogginu, skrif hans og "uppljóstranir". Fólk hefur fussað og sveiað yfir þessu en gleymir einu.......

Hvern einasta dag skrifar einhver bloggari um "mann útí bæ" sem gerði svo og svo af sér þennan eða hinn daginn. Skammlaust virðist fólk telja að rati einhver í fréttir þá sé sjálfsagt að blogga um viðkomandi og velta sér upp úr málinu. Dæmi um þetta eru mýmörg. Hefði ég nennu þá myndi ég skella nokkrum inn. Fylgist bara með þessu, þið getið bara ákveðið að lesa með augum þess sem um er fjallað og þá sjáið þið hvað ég er að meina.

Þegar Himmi dó þá gleymdi ákveðinn fréttamiðill að taka burt möguleikann á að blogga um fréttina. Áður en ég komst í málið, athyglin ekki kannski á svoleiðis þá stundina, og bað þá um að afnema þessa fréttatengingu þá voru hinir og þessir búnir að fjalla um málið. Ég get sagt ykkur það að enn fer um mig hrollur þegar ég rifja upp orðalag fólks við þetta atvik.

Ég fékk skammir fyrir að skrifa um ákveðinn hlut sem tengdist Himma. Viðkomandi óttaðist að vera bendlaður við málið, þekkjast af málsatvikum. Og svo fékk ég skammir fyrir að hafa tekið þetta út, frá sama aðila. Ég tók það reyndar ekki, færði það bara og það var þessu óviðkomandi. Enn í dag skil ég ekki hvernig þessi aðili gat fengið það út að um nákvæmlega hann var rætt. Það komu, því miður, margir til greina miðað við lýsinguna af atburðunum. Og þetta atvik skipti í raun ekki því máli fyrir okkur eftir á að hyggja, það var bara sett fram til skýringar. En það skipti þennan aðila miklu máli, það skil ég vel.

Af þessu má sjá að þó maður telji sig fara varlega og skrifa þannig að ekki á undan að svíða þá kannski tekst manni það ekkert. Maður er kannski að meiða með orðum án þess  að hafa á nokkurn hátt ætlað sér það.

Gáum hvað við segjum og munum, á bakvið fréttir er fólk.

(hérna er smáviðbót fyrir þá sem lesa ensku. Verulega undarleg saga - mér dettur í hug flökkusaga.En í þeirri von að viðkomandi asnist ekki inn á síðuna mína þá set ég þetta inn og brýt þar með af mér miðað við innihald pistilsins að ofan )

 

 

Á rokvaktinni

Ég er að fylgjast með þessum fellibyl sem ætlar að fjúka yfir Big Easy, eins og Katarina hafi ekki verið nóg. CNN er búið að planta fréttamönnum um allt hamfarasvæðið svo sauðir eins og ég geti nú séð hvern regndropa og hverja hviðu. Hvernig ætli sé valið á svoleiðis vinnuvaktir ? Hey þú BOB, með minnstan starfsaldur, stattu úti á götu í New Orleans þangað til á morgun, þú færð yfirvinnu !

Tina min elskuleg kom með þetta í komment hjá mér. Þetta er fallegt

Þó ég sé látinn........

                      Þó ég sé látinn, harmið mig ekki með tárum.

                      Hugsið ekki um dauðann með harmi og ótta;

                      ég er svo nærri og hvert eitt ykkar tár snertir

                      mig og kvelur, þótt látinn mig haldið...........

                      En þegar þið hlægið og syngið með glöðum

                      hug, sál mín lyftist upp í mót til ljóssins:

                      Verið glöð og þakklát fyrir allt sem lífið

                      gefur, og ég ,þótt látinn sé, tek þátt í gleði

                      ykkar yfir lífinu.........

ég ætla að lesa þetta oft. Takk mín kæra.

Viðgerðin heldur áfram á hinni síðunni. Mér datt í hug í gær þegar ég renndi lauslega yfir lífið að það er eins og ég hafi farið í gegnum það á tveimur vinstri fótum. Djö fæ ég flottan bikar þegar það verður búið ! Himnajólarnir standa áreiðanlega í röð til að sjá þessa kellingu koma vappandi. Ég held að ég sé tilrauna dýr.

Ja hérna, svo hlæ ég að þessu. Maður er náttlega ekki í lagi hehehe

Try JibJab Sendables® eCards today!