Ég er alltaf að hugsa

Og núna hef ég hugsað um þetta hérna. Víða fjallar fólk um þetta mál enda ekki nema von. Það er ekkert á hverjum degi sem fólki sem ekki hefur gengið þessi spor, er sýnt svart á hvítu úrræðaleysi kerfisins. Og í athugasemdum spinnast umræður, stundum merkilegar en stundum eru þær fullar dómhörku, sleggjudómum og skilningsleysi.

Málið er samt einfaldlega þetta. Það er nákvæmlega alveg sama hvað bloggarar eða kommentarar út í bæ segja. (ég ætla að skrifa þetta út frá móður) Móðirin er áreiðanlega sjálf búin að ásaka sjálfa sig fyrir allt það sem fólki dettur í hug að segja um aðstæðurnar.

Margir trúa því enn að börn fíknarinnar komi bara frá slæmum heimilum, það gera þau auðvitað ekki. Oft hafa aðstæður ekki verið þær bestu en samt verið reynt að gera það besta út litlum efnum. Mig truflaði mest peningaleysi, ég vann þá meira, og þá truflaði mig tímaleysi. Ég hefði viljað eyða mun meiri tíma í og með krökkunum mínum en ég hafði tök á. Það var bara ekki í boði.

Fólk ýjar að því að öll sagan sé ekki sögð þegar fréttir eins og þessi sem ég tengi í eru sagðar. Hvað vill fólk fá að vita meira ? Afhverju þarf alltaf að láta í það skína að uppeldið,foreldrarnir og fjölskyldan séu sökudólgarnir ? Unglingur á viðkvæmum aldri þarf ekki mikið til að renna út af sporinu. Stundum eru ein mistök nóg. Ég hef fengið upplýsingar um allskyns vandamál, oftast tengd sonum fólks. Fólk vill deila reynslu, eðlilega. Fólki vantar einhvern sem skilur, án þess að dæma. Í afar mörgum tilvikum var EIN neysla nóg, fíknarviðbragðið svo sterkt að það tók yfir líf viðkomandi þar með.

Horfið á útigangsmennina. Hver vill vera svona ? Uppivöðslusamur, í tötrum, hlandblautur á almannafæri.

Í fjölskylduboðum spyrja gamlar frænkur börnin ; hvað ætlar þú að verða væni minn þegar þú verður stór ? Hafið þið einhverntímann vitað til þess að einhver hafi svarað ; Fíkill ! Eða sagði eitthvert barnið ; Róni!

Nei auðvitað ekki, þetta ætlar sér enginn. Himmi sagðist ekkert ætla að vera fangi ; hann ætlaði sko að verða bílstjóri, eins og pabbi á stóra bílnum. Það var flottast !

Samt sagði ég við vinkonu mína, þegar Himmi var 3-4 ára. ,,Hann á eftir að verða til vandræða þessi ungi maður, meiri skelfingin sem það er erfitt að fá hann til að gegna ! Ef hann ekki lærir þá verður hann inn og út af Hrauninu!! "

Ég vissi það þá. Og allt var reynt til að teyma hann í réttar áttir, það bara gekk ekki.

En í hvert sinn sem ég les...þarna er ekki öll sagan sögð þá reiðist ég innan í mér. Það skiptir ekki máli. Málið er að bregðast við aðstæðum í núinu. Það breytir enginn fortíð sinni, hvorki mæður fíkla né mæður fyrirmyndarbarna. Ekki ætlast til þess.

Svo til að það sé kristalstært þá þekki ég ekkert til þessarar ungu stúlku sem fjallað er um í viðtengdri frétt. En ég þekki þetta skrattans úrræðaleysi kerfisins. Ég hef enga tölu á því hversu oft Hjalli minn var týndur. Og ég vissi alveg að engin viðbrögð yrðu, hætt að búast við því. Kerfið bregst of seint við. Að hluta til er um að ræða plássleysi á neyðarvistun, það voru amk bara 4 pláss fyrir krakka sem eru komnir á eyðileggingarbraut. Það er fyrir allt landið. Það er of lítið. Allt of lítið.

Næst þegar þið lesið slíka frétt og gloprið þessu út ; það vantar eitthvað meira inn í þessa sögu ?! Hugsið málið aðeins, hvað finnst ykkur vanta ?

Góðar stundir

Dagur að kveldi kominn

og ég sit hérna í húminu, þreytt og alveg að sofna.

Eins og þær hafa sagt, hinar yndislegu mæður sem misst hafa börn á undan mér, þá varð hann ekki eins slæmur og ég bjóst við.

Ég sat hér í gærkvöldi og gaut augunum á klukkuna í tölvunni. Ég held að ég hafi búist við eldingu beint í hausinn um leið og miðnætti gekk í garð.

Klukkan sló.

Það gerðist nákvæmlega ekkert.

Ég blikkaði augunum, varfærnislega, en það breytti engu.

Dagurinn ljóti var kominn og hann varð bara venjulegur þriðjudagur.....

nema...ég hitti allt fólkið mitt. Gísla og Heiði og krakkana, þau eru talin með mínu fólki. Siggu systur og strákana hennar. Hjalta og Anítu. Sollu, Vigni og Hilmar. En svo kom rúsínan í pylsuendanum......

Útihurðin opnaðist og björt barnsrödd kallaði með gleðihljómi : AMMA!!

Inn endasentist Patrekur og beint í ömmufang ! Þá komu þau mæðginin óvænt suður og kíktu við hérna í dag.

Enn og aftur sé ég hversu gott er að búa hérna í sveitinni. Krakkarnir geta valsað hér um og allt er í besta lagi.

Við hittumst í garðinum í dag og Gísli og Heiður komu með fallega lugt til að hafa hjá honum, hún er fest á samskonar kubb og engillinn sem ég kom með um daginn. Systurnar komu með tvo fallega engla til hans. Ég setti hjá honum fjórar rauðar rósir. Svo gengum við öll í halarófu til hans Hauks hennar Birnu Dísar, ég fer orðið alltaf til hans þegar ég fer í kirkjugarðinn. Við skoðuðum steininn hans og hugsuðum til strákanna okkar, elsku strákanna sem réðu ekki við lífið. Andlát þeirra bar ekki eins að en ég get örugglega haldið því fram að sorgin sé svipuð.

Kærar þakkir fyrir hlýjar og fallegar kveðjur -hlýhug og stuðning í vonlausum aðstæðum, þetta hjálpar.

En nú ætla ég að fara að vinna, vinna í sjálfinu..sættast við það sem truflar mig. Finna leiðina.

Kínverskt máltæki segir að börn sem verði fullorðin fari að heiman, börn sem deyja fara aldrei burt.

 

 

Ég hef ákveðið

að lesa ekki orð af því sem fráfarandi eða viðtakandi borgarstjórn segir. Nú eru allir teknir við að leika "the blame game" sem var vinsæll á árum kalda stríðsins. Nenni ekki að eyða tíma í þetta lið.

Ég komst að því í dag að ég bý í líkhúsi. Það er lík á þakinu og engum hefur komið til hugar að rukka viðkomandi vegna legupláss. Við erum heldur ekki í Kirkjugarðasambandinu hérna, bara lítið einkarekið líkhús hérna. Það er dauður starri á þakinu. Lalli og Alda komu í dag og þeir kallar kláruðu að setja nýju rúðurnar í. Svo ákváðu þeir að skoða betur þakið og þá fannst þetta lík..greyið.

En handboltaleikurinn var OF spennandi í dag...djís...Sjaldan sem maður sér hinn danska Ulrik fá algerlega kast á hliðarlínunni. Mér fannst Loga hent út með rautt fyrir litlar sakir en Ingimundur mátti þakka fyrir að lafa inn á velli eftir slæmt brot í fyrri hálfleik.

Ég er farin.

Myndafærsla

Ég er óttalega prakkaralegur að labba meðfram ömmuborði.

Sko ! Stend þarna alveg sjálfur !

Eins og sloppið hafi þeytispjald. (færsla 726)

Hugurinn er á einhverju spani þessa dagana...það gengur mikið á í höfðinu á mér og mér tekst ekki alveg að stoppa það. Það er einkennilegt, maður veit betur en samt stressar maður sig á hlutum sem maður getur ekki breytt eða haft áhrif á. 19 ágúst kemur, ég get ekki stokkið yfir hann eða frestað honum, ég þarf bara að láta hann koma og fara. En í staðinn fyrir að bíða róleg þá tætist ég um innan í mér....

Undirrót kvíðans er áreiðanlega sú að þessi dagur var skelfing í fyrra. Undirmeðvitundin heldur vísast að hann verði jafnslæmur í ár. Hann verður það ekkert, segir skynsemin hryssingslega við taugaveikluðu undirmeðvitundina. Hvort ætla ég að hugsa með hjartanu eða heilanum ? Það er spurning. Það versta við þessi innri átök er að þeim fylgir versti höfuðverkur í heimi. Það eru kannski harðsperrur ?

Bíllinn minn bíður á verkstæðinu upp á von og óvon. Kannski kom varahluturinn um hádegið ? Það kemur í ljós.

Ég tók afrit af síðunni minni áðan og ætla að setja það inn á flakkara sem ég er með til að geyma tölvuafrit á. Ég verð að passa mig mikið á að tapa ekki myndum sem ég á, ég á sumar myndir af Himma bara hér á tölvuformi en ekki útprentaðar. Ég er ekki svo tæknivædd að eiga prentara sem prentar út myndir, ég á bara gamaldags skjalaprentara.

Ég er samt ekki ein heima. Hér eru hvuttar og Keli er að haga sér óvenjulega. Hann horfir á mig einhverjum ástaraugum, þau eru þannig að hann verður píreygur og manni finnst geisla úr þeim hlýju. Hann lætur hinsvegar stundum svona þegar ég er meira niðurbrotin en vant er. Án orða. Þá hangir hann hjá mér og virðist vera upptekin af því að passa gömlu sína vel.

Ég er enn að horfa á ÓL 08 þó það þyki ekki PC rétt að horfa á það. Ég hef gaman af þessum íþróttamönnum og ekki skemmdi sá sem lýsti frjálsum áðan fyrir. Hann vissi nánast allt um keppendur og ég fyllti hausinn af ónauðsynlegum upplýsingum um keppendur...og hafði gaman að. Nú er verið að keppa í tennis, það er svosem ekki sérstaklegt uppáhald hjá mér. En það kemur eitthvað annað á eftir.

Mér skildist að þeir væru búnir að ganga þannig frá málum að við munum sjá Þóreyju Eddu í stönginni á morgun. Þeir eru búnir að fá myndavél til að fylgja henni eftir og fá að klippa á hana að vild. Mér finnst gaman að stangarstökkinu eins og flestum frjálsum.

Man ekki meira nema í anda ÓL setti ég nýtt Álftanesmet áðan í að bjarga þvottinum af snúrunni...

Áskorun á karla á blogginu.

Hér gengur nú undirskriftalisti gegn ofbeldi á konum. Það er sjálfsagt og eðlilegt að konur skrifi sig á þennan lista, okkar sjálfrar vegna, dætra okkar og mæðra. Ég hef mikinn áhuga á að sjá karla taka skýra afstöðu og skrifa sig á þennan lista. Einn maður hér á blogginu hefur oft skrifað til stuðnings systursamtökum Stígamóta, í augnabliki man ég ekki nafn þeirra samtaka en minnir að þau heiti Afl. Það er www.jensgud.blog.is .

Ég hef sjálf ekki linkinn á þennan undirskriftalista en ég fann hann í kvöld og hef séð að hann er víða birtur. Ég ætla að reyna að finna hann og koma með hann á þessa færslu.

Svo er það spéhræðslan, hvaðan er allt þetta fólk að koma sem hefur litið við á síðunni minni í dag ? Hvernig væri að kvitta fyrir komunni fólk ?

Nú er kominn nýr borgarstjóri, ég sé ekki ástæðu til að óska viðkomandi til hamingju. Það er ljóst að hnífasett Framsóknar eru vel brýnd ennþá samanber samkomulag Tjarnarkvartettsins og viðsnúning Framsóknar. Stjórnmálamenn sem gera allt fyrir völd eru ansi ómarktækir. Ég ætla samt að sjá hvort þetta fólk getur gert eitthvað vitrænt, ekki kom mikið af viti úr síðasta samstarfi.

 

Í þessari færslu er undirskriftalistinn  . Koma svo karlar, taka áskorun ! Með samstilltu átaki er hægt að breyta mörgu.

Fréttamoli dagsins...

og þessi moli er miklu betri en borgarstjórnarvesen og kynferðisbrotamenn.

 Þessi svaka súpersæti...er farinn að labba, fyrstu skrefin voru tekin áðan. Það var ekki byrjað á einu heldur á þremur skrefum.

Hva segir sá stutti ,, ég er nú orðinn 8 mánaða amma!"

Sætastur og flottastur !

Í fyrsta sinn

Ákveð ég að birta héraðsdóm fólki til fróðleiks. Það kann þó að vera að áhuginn á þessu verði ekki mikill í dag enda sviptingar í borginni...í fjórða sinn. Erum við ekki að tala um enn einn borgarstjórann á biðlaunum ?

Hérna fyrir neðan er þessi dómur en dóma getur maður nálgast á www.domstolar.is

Þetta er einn þyngsti dómur í kynferðisbrotamáli sem kveðinn hefur verið upp hér á landi.   

 

 

 Mánudaginn 19. maí 2008 kl. 20.32 var lögregla boðuð að heimili í Reykjavík vegna tilkynningar um að þaðan hafi verið numið á brott barn. Á vettvangi tók á móti lögreglu kona C. Gerði hún lögreglu grein fyrir því að vinafólk hennar hafi komið og tekið dóttur hennar, B, og haft á brott með sér. Í máli C kom fram að B og stjúpfaðir hennar A, ákærði í máli þessu, hafi verið að deila. Í frumskýrslu kemur fram að lögregla hafi haft tal af ákærða sem skýrt hafi frá því að hann hafi kysst stjúpdóttur sína á munninn og hafi það gerst nokkrum sinnum á liðnum vikum. Þetta kvöld hafi þau kysst þannig að tungur þeirra hafi snert hvora aðra. Var ákveðið að færa ákærða á lögreglustöð á meðan málið væri kannað frekar. Á leið á lögreglustöð tjáði ákærði lögreglumönnum að honum fyndist athygli sem B sýndi honum óþægileg. B hafi oft sofið uppi í rúmi ákærða og eiginkonu hans og vildi hún þá sofa við hlið ákærða. Hafi ákærði reynt að útskýra fyrir B að honum fyndist þetta óþægilegt. Ákærða var síðar sama kvöld sleppt úr haldi lögreglu.

            Mánudaginn 26. maí 2008 mætti C á lögreglustöð og lagði fram kæru á hendur ákærða fyrir kynferðisbrot gagnvart dóttur sinni. Kvað hún dóttur sína hafa greint sér frá því að ákærði hafi staðið í kynferðislegum samskiptum við hana. Hafi hún haft munnmök við ákærða og strokið getnaðarlim hans. Þá hafi þau haft samfarir. Það hafi átt sér stað í svefnherbergi á heimili ákærða og C. 

            B var skoðuð í Barnahúsi 28. maí 2008 af Jóni R. Kristinssyni barnalækni og Ebbu Margréti Magnúsdóttur kvensjúkdómalækni. Samkvæmt skýrslu þeirra frá 12. júní 2008 er kynþroski stúlkunnar á III. stigi hvað varði brjóst og kynfæri. Ytri kynfæri séu eðlileg, en meyjarhaft rofið með óreglulegum köntum. Niðurstöður skoðunar samrýmist sögu stúlkunnar. Skoðun leiði í ljós að það sé eins og stúlkan stundi reglulegt kynlíf.

            Miðvikudaginn 28. maí 2008 var tekin skýrsla af ákærða hjá lögreglu. Ákærði kvaðst hafa gifst C, móður B, árið 1999. B hafi verið í Thailandi og ekki komið til Íslands fyrr en 2006. Ákærði kvaðst á kvöldin ávallt hafa farið með dóttur sína og fósturdóttur inn í svefnherbergi til að lesa fyrir þær, en um hafi verið að ræða 5 ára dóttur ákærða og eiginkonu hans C og síðan B. Hafi hann þá venjulega strokið þeim báðum um bakið. Ákærði kvað atburði tengda sakarefni málsins hafa byrjað um mánaðarmótin janúar-febrúar 2008. Eitt kvöldið hafi hann verið að strjúka stúlkunum um bakið, nema það kvöld hafi B legið á bakinu án þess að ákærði hafi tekið eftir því. Hafi það ekki verið fyrr en hann hafi snert á henni brjóstin. Hafi ákærða brugðið við þetta, en ekkert meira hafi gerst í þetta skipti. Ákærði hafi haldið áfram að lesa fyrir stúlkurnar á kvöldin. Einhverju síðar hafi það komið fyrir aftur er ákærði hafi verið að strjúka B um bakið að hann hafi komið við brjóst hennar. Hafi ákærði haft höndina á brjóstinu í stuttan tíma en síðan kippt henni til baka. Hafi þetta gerst oft og ákærði verið farinn að finna fyrir óþægindum út af þessu en honum hafi fundist þetta vera rangt. Hafi þetta leiðst út í að þau hafi haft samfarir. Hafi það byrjað með því að í eitt sinn er stúlkan hafi komið heim úr skólanum hafi þau verið tvö ein heima. Hún hafi verið leið og ákærði farið inn til hennar og spurt hvað væri að. Fram hafi komið að henni hafi verið strítt í skólanum. Hafi ákærði farið að hugga hana og hún tekið utan um ákærða. Síðan hafi hún kysst ákærða. Hafi hún viljað að ákærði stryki á henni brjóstin og ákærði gert það. Hafi hún lagst við hliðina á ákærða og lagst þétt að honum. Hafi ákærði snúið henni yfir á bakið og hún lagst ofan á ákærða. Þannig hafi hún legið ofan á ákærða og síðan farið að hreyfa sig. Hafi ákærði svarað með því að strjúka henni yfir buxurnar. Hafi ákærði orðið æstur og sett hendi niður í nærbuxur hennar. Hafi ákærði losað um buxur hennar og sett getnaðarlim sinn við fætur hennar. Í framhaldi hafi þau haft samfarir. Ákærði kvað stúlkuna ekki beint hafa gefið samþykki sitt fyrir samförunum í orðum. Honum hafi hins vegar fundist hún gera það í því sem hún hafi gert. Þessar athafnir hafi sennilega byrjað rétt fyrir byrjun febrúar 2008. Ákærði hafi ekki notað verjur við þessar samfarir en hins vegar við þær sem á eftir hafi fylgt. Ákærði hafi stundum fengið fullnægingu í samförunum. Einhverju sinni hafi ákærði leyft henni að hafa við sig munnmök. Einu sinni hafi ákærði haft munnmök við stúlkuna. Ákærði kvaðst telja að hann hafi haft samfarir við stúlkuna á bilinu 15 til 20 sinnum. Stúlkan hafi haft munnmök við ákærða 5 til 6 sinnum. Ákærði hafi haft mök við hana í endaþarm 5 til 6 sinnum. Ákærði kvað samband sitt og eiginkonu hans hafa verið slitrótt um þetta leyti. Hafi hann með B fundið tilfinningu sem hann hafi saknað mjög lengi um að einhverjum þætti vænt um hann án þess að dæma ákærða fyrir það hvernig hann liti út. Hafi ákærði hundsað allar viðvörunarbjöllur í höfði sínu. Síðar hafi hann séð hve stúlkunni hafi liðið illa. Hafi ákærða fundist sem hann væri farinn að líkjast fósturföður sínum sem misnotað hafi ákærða í æsku. Hafi ákærði séð hann í sjónum sínum og það verið meginástæða þess að ákærði hafi lagst inni á deild 32A á Landspítalanum. Ákærði kvaðst hafa bannað stúlkunni að segja neinum frá athöfnum þeirra. Hafi ákærði áttað sig á því að það væri rangt sem hann væri að gera. Upp hafi komist um athafnir þeirra er vinkona eiginkonu ákærða hafi komið í heimsókn, en þann morgun hafi B legið við hlið ákærða í rúminu. Hafi vinkonan spurt hvað væri í gangi. Þá hafi komist upp að ákærði og B hafi verið að kyssast. Vinkonan hafi farið með B út af heimilinu og heim til sín. Eftir að lögregla hafi blandast í málið hafi ákærði tjáð lögreglu að ólöglegt samband hafi verið á milli hans og fósturdóttur hans. Ákærði hafi ekki sagt alla söguna en sagt að þau hafi verið að kyssast.

            Ákærði var aftur yfirheyrður af lögreglu mánudaginn 7. júlí 2008. Var þá borinn undir ákærða sá framburður B að ákærði hafi haft endaþarmsmök við hana á bilinu 20 til 30 sinnum. Kvaðst ákærði ekki muna hve oft hann hafi haft við hana endaþarmsmök, en hann kvaðst efast um að það hafi verið eins oft og stúlkan miðaði við. Þá kvaðst ákærði ekki muna hve oft hann hafi haft við hana samfarir. Hin kynferðislegu samskipti á  milli þeirra hafi byrjað seinni partinn í janúar 2008 eða í byrjun febrúar 2008. Ekki hafi ákærði orðið var við að blætt hafi úr kynfærum stúlkunnar við samfarirnar. 

            Við aðalmeðferð málsins fyrir dómi kvaðst ákærði vilja vísa til þeirrar skýrslu sem tekin hafi verið af honum við lögreglurannsókn málsins um atvik. Kvaðst hann vera þeirrar skoðunar að hann hafi haft endaþarmsmök við stúlkuna í 5 til 6 skipti. Þá hafi hann haft við hana samræði í 15 til 20 skipti. Hafi það gerst allt að 2 sinnum í viku. Stúlkan hafi ekki átt frumkvæði að kynferðismökunum. Bæri hún ekki ábyrgð á neinu því sem gerst hafi í samskiptum þeirra. Hafi hann á fyrstu stigum ekki leitt hugann að því hvort brot hans myndu hafa áhrif á líf stúlkunnar. Það hafi hann ekki gert fyrr en nokkrum dögum áður en hann hafi verið úrskurðaður í gæsluvarðhald vegna málsins. Ákærði kvaðst hafa verið misnotaður af fósturföður sínum í æsku. Hafi ákærði verið 6 ára gamall á þeim tíma. Þeir atburðir hafi haft slæm áhrif á líf ákærða. Hann hafi þó ekki áttað sig á því fyrr en síðar. Hafi ákærði fyrst sagt móður sinni frá hinni kynferðislegu misnotkun þegar ákærði hafi verið 18 ára að aldri.

            Föstudaginn 6. júní 2008 fór fram skýrslutaka fyrir dómi af B á grundvelli 1. mgr. a liðar 74. gr. laga nr. 19/1991 um meðferð opinberra mála. Gerði hún grein fyrir því að ákærði hafi haft kynferðisleg samskipti við sig. Hafi hann oftsinnis sett getnaðarlim sinn inn í endaþarm B. Hafi það verið á bilinu 20 til 30 sinnum. Þá hafi hann einnig sett fingur í endaþarm hennar. Hann hafi strokið á henni brjóstin. Einnig hafi ákærði haft samræði við hana. Hafi það sennilega verið 10 sinnum sem þau hafi haft samræði. Einnig hafi hún strokið getnaðarlim ákærða. Auk þess hafi hún haft við hann munnmök. Ákærði hafi einnig haft munnmök við hana. Hin kynferðislegu samskipti hafi átt sér stað í svefnherbergi ákærða og móður hennar, í svefnherbergi B og í sófa í stofu. B kvaðst ekki hafa átt í kynferðislegum samskiptum við nokkurn áður en samskiptin við ákærða hafi byrjað. Hafi hún verið sár og miður sín þegar þessir hlutir hafi gerst. Hafi hún farið að gráta. Hafi hún meitt sig inni í hjartanu. Blætt hafi úr kynfærum hennar við athafnirnar. B kvaðst ekki vera viss um á hvaða tímabili athafnirnar hafi átt sér stað.

            Margrét Kristín Magnúsdóttir sálfræðingur í Barnahúsi kvaðst fram að aðalmeðferð málsins hafa hitt B 3 sinnum vegna málsins. Viðtöl við stúlkuna hafi verið erfið. Stúlkan ætti mjög erfitt með að tjá sig og væri þögul. Gæti það að hluta skýrst af mismunandi menningarheimum vegna mikillar skammar sem fylgdi atvikum sem þessum. Þá kenndi stúlkan sjálfri sér að einhverju leyti um hvernig væri komið hlutunum og hvernig fjölskyldan hafi sundrast. Væri það þekkt í tilvikum sem þessum. Liði stúlkunni mjög illa vegna þess. Um þessar mundir væri Margrét að vinna í þeim grunnatriðum sem vinna þyrfti í hjá stúlkunni. Væri hún því stutt komin í meðferðinni sjálfri. Stúlkan ræddi um leiða og skömm. Almennt væri erfitt að segja til um batahorfur vegna tilvika sem þeirra er stúlkan hafi lent í. Miðað við reynslu hér á landi væru þessi brot mjög gróf. Tilfinningalega væri stúlkan meira barn en ungmenni. Hafi hún talað um að hún hafi ekki áður orðið fyrir viðlíka reynslu.

            Gunnar Hrafn Birgisson sálfræðingur gerði grein fyrir helstu niðurstöðum sálfræðiskýrslu sinnar vegna ákærða. Ákærði hafi verið mjög miður sín og í miklu uppnámi er Gunnar hafi hitt hann, en ákærði hafi þá verið í gæsluvarðhaldi á Litla Hrauni. Hafi hann í viðtali verið einlægur og hreinskilinn.

            D, móðir ákærða, kvað son sinn við 18 ára aldur hafa greint sér frá því að hann hafi verið misnotaður af fósturföður sínum er hann hafi verið 6 ára að aldri. Hafi henni verið það mjög minnisstætt að ákærði hafi skyndilega byrjað að stama við 6 ára aldur. Hafi henni brugðið mjög við það. Stamið hafi aukist mjög með árunum og er hann hafi verið orðinn 18 ára hafi nánast þurft að túlka það sem hann sagði. Fyrrum sambýlismaður hennar hafi ekki verið ákærður fyrir brot sín gagnvart ákærða, en hann hafi verið dæmdur fyrir brot gegn systur ákærða. Skólaganga ákærða hafi verið mjög erfið. Hafi hann oft þurft að skipta um skóla og það farið mjög illa með hann. Systir ákærða hafi fengið aðstoð vegna þeirra brota er hún hafi orðið fyrir. Það hafi hins vegar ekki orðið með ákærða. 

 

 

            Niðurstaða:

            Ákærða er gefið að sök kynferðisbrot, gagnvart fósturdóttur sinni B, með því að hafa í nokkur skipti strokið brjóst stúlkunnar innan klæða, í nokkur skipti sett fingur inn í kynfæri hennar og endaþarm, í nokkur skipti látið hana halda um getnaðarlim sinn, í eitt skipti haft munnmök við hana, í 5-6 skipti fengið hana til að hafa við sig munnmök, í fjölmörg skipti haft við hana endaþarmsmök og loks í fjölmörg skipti, allt að tvisvar sinnum í viku, haft samræði við stúlkuna. Samkvæmt ákæru eiga athafnir þessar að hafa átt sér stað í svefnherbergi á heimili þeirra í Reykjavík, frá því í lok janúar eða byrjun febrúar 2008 fram í maí 2008. Við rannsókn málsins hjá lögreglu hefur ákærði viðurkennt háttsemi sína og lýst henni í samræmi við ákæru. Fyrir dómi hefur ákærði játað sök, utan að hann kveðst hafa haft endaþarmsmök við stúlkuna í 5 til 6 skipti. Séu það ekki fjölmörg skipti, svo sem ákæra tilgreini. Hefur framburður hans fyrir dómi verið í samræmi við ákæru. Þá gaf B skýrslu við rannsókn málsins. Hefur framburður hennar verið í samræmi við játningu ákærða, utan að hún kveður endaþarmsmökin hafa átt sér stað á bilinu 20 til 30 sinnum. Þá kveður hún samræðið hafa átt sér stað 10 sinnum. Miðað við framburð ákærða hjá lögreglu og fyrir dómi, niðurstöðu læknisskoðunar á stúlkunni og í ljósi framburður B telur dómurinn sannað að ákærði hafi framið þau brot er í ákæru greinir. Verður í niðurstöðu miðað við að ákærði hafi í mörg skipti haft endaþarmsmök við B. Er háttsemin rétt heimfærð til refsiákvæða í ákæru.

            Ákærði hefur ekki áður gerst sekur um refsiverða háttsemi, svo kunnugt sé. Ákærði hefur verið sakfelldur fyrir mjög alvarleg kynferðisbrot gagnvart stúlkubarni sem var í upphafi 11 ára en að mestu 12 ára þegar brotin voru framin. Voru brotin framin á heimili stúlkunnar og ákærða, þar sem stúlkan átti sér griðarstað. Brot ákærða voru einstaklega gróf og ófyrirleitin, en hann hafði á um fjögurra mánaða tímabili m.a. margsinnis samræði við stúlkuna og endaþarmsmök. Voru brotin til þess fallin að valda stúlkunni verulegum skaða. Á ákærði sér þær málsbætur einar að hann hefur játað sök. Dómurinn telur að Hæstiréttur Íslands hafi á liðnum misserum almennt þyngt refsingar vegna kynferðisbrota. Eigi það m.a. við um brot gegn 201. og 202. gr. laga nr. 19/1940, en nýverið hafa verið gerðar breytingar á XXII. kafla laga nr. 19/1940 til að kveða á um að mál þessi verði tekin fastari tökum en áður. Með vísan til alls þessa, sbr. og 1., 2., 6. og 7. tl. 1. mgr. og 3. mgr. 70. gr. laga nr. 19/1940 er refsing ákærða ákveðin fangelsi í sex ár. Til frádráttar refsingu kemur óslitið gæsluvarðhald ákærða frá 2. júní 2008.  

            Réttargæslumaður hefur fh. B krafist skaðabóta úr hendi ákærða. Er krafist bóta að fjárhæð 3.000.000 krónur, auk vaxta. Er vísað til þess að ákærði hafi misnotað á mjög grófan hátt aðstöðu sína. B hafi nýlega flutt til Íslands og talað litla sem enga íslensku. Hafi hún leitað til ákærða sem hafi veitt henni hlýju og hann misnotað það gróflega. Hafi ákærði misnotað það traust sem stúlkan hafi sýnt honum og brotið gegn umsjónar- og eftirlitsskyldum sínum. Jafnframt hafi hann misnotað yfirburði sína sem fullorðinn einstaklingur gagnvart barni. Brotið hafi í för með sér sálrænar afleiðingar, svo sem skerta sjálfsmynd. Brotið hafi verið framið á stað þar sem stúlkan hafi talið sig óhulta. Þá sé stúlkan á mjög viðkvæmum aldri og geti brotin haft mjög neikvæð áhrif á mótun hennar sem persónu. Um lagarök er vísað til 26. gr. laga nr. 50/1993. Með vísan til þess er hér að framan er rakið, vættis Margrétar Kristínar Magnúsdóttur sálfræðings, sem og þess er fram hefur komið fyrir dóminum er það niðurstaða dómsins að framferði ákærða hafi valdið B miska. Á hún rétt á skaðabótum vegna háttsemi hans á grundvelli 26. gr. laga nr. 50/1993. Í ljósi atvika málsins sem leiða í ljós mjög gróft kynferðisbrot gagnvart ungu barni og dómaframkvæmdar á þessu réttarsviði eru bætur þessar hæfilega ákveðnar 2.500.000 krónur. Sú fjárhæð ber vexti eins og í dómsorði greinir.

            Ákærði greiði allan sakarkostnað samkvæmt yfirliti ríkissaksóknara um sakar­kostnað ásamt tildæmdum málsvarnarlaunum og þóknun réttargæslumanns brotaþola, hvorutveggja að viðbættum virðisaukaskatti, sem í dómsorði greinir.

            Af hálfu ákæruvaldsins flutti málið Sigríður J. Friðjónsdóttir saksóknari.

 

 

                                                           D ó m s o r ð:

            Ákærði, A, sæti fangelsi í 6 ár. Til frádráttar refsingu kemur gæsluvarðhald ákærða frá 2. júní 2008.

            Ákærði greiði B, 2.500.000 krónur í skaðabætur, ásamt vöxtum samkvæmt 8. gr. laga nr. 38/2001 frá 1. febrúar 2008 til 7. ágúst 2008, en með dráttarvöxtum skv. 1. mgr. 6. gr. sömu laga, frá þeim degi til greiðsludags.

            Ákærði greiði 1.200.906 krónur í sakarkostnað, þar með talin málsvarnarlaun skipaðs verjanda síns, Guðrúnar Sesselju Arnardóttur héraðsdómslögmanns, 547.302 krónur, og þóknun til réttargæslumanns brotaþola, Þórdísar Bjarnadóttur héraðsdóms­lögmanns, 257.964 krónur.

 

 

                                                                     Símon Sigvaldason

 

 

 

 

           

Góðverk dagsins

held ég að komi frá Óskari framsóknarmanni að vilja ekki nýjan Tjarnarkvartett, nú má ekki misskilja mig. Þau voru og eru langsamlega best til þess fallin að stjórna borginni. Greiðinn er falinn í því að taka ekki við keflinu við þessar kringumstæður heldur við næstu kosningar þegar þau vinna borgina, hreint og klárt samkvæmt vilja borgarbúa þá.

Ég sé fyrir mér stórsigur Tjarnarkvartettsflokkanna þá.

Heyrði aðeins í dindind minni áðan, sneiðmynd næsta mánudag og niðurstaða úr því miðvikudaginn á eftir. Það er mikil tilhlökkun að sjá hversu mikið krabbinn hefur hopað.

Alveg brjáluð

sko hún Búkolla í Eyjum yfir tapinu. Það var eins gott að þetta munaði bara einu marki.....

Passið ykkur á henni, hún borðar danska jólaóróa í morgunmat og stangar úr tönnunum með pólskum dómurum !

Nei ég er ekki farin að sofa ! Fengi bara martröð !

Þrumuveður í Eyjum