Ég eignaðist óvart frídag

og hugsaði með mér að best væri að nota hann í tilgangslaust sjónvarpsgláp en þá rifjuðust upp fyrir mér auglýsingar Skjás eins um stelpustöð eða hvurn skrattann þetta heitir hjá þeim. Og ég fann hárið rísa upp í hnakkanum á mér af pirringi. Einhvernveginn halda dagskrárstjórar að það þurfi að gera eitthvað alveg sér sjónvarpsefni fyrir konur. Einhverjar bull langlokur um húsmæður í hinum og þessum klemmur og fíflalegum uppákomum. Á meðan fá strákarnir að horfa á fótbolta eða spennandi sakamálaþætti og allskonar sniðugt efni.

Hvurslag vitleysa er þetta ?

Þegar maður er 6 ára þá má maður ekki horfa á bannað innan 12. Svo smáfærist maður upp prikið og má að lokum horfa á það sem manni sýnist, nema maður sé kona (stelpa í þeirra skilgreiningu) þá er allt í einu sortérað ofan í mann þvílíki vibbinn að manni stendur bara ekki á sama.

Skýrasta dæmið um helvítis vibbann sem maður á að sættast við að horfa á er þessi auglýsing frá LU kexinu. Fari það nú norður og niður. Hellingur af flottum konum að fara á límingunum yfir einhverju happdrættisrugli í kexpakka?

Ég þekki bara ekki nokkra konu sem lætur svona og ég kaupi bara ekki vöru sem auglýsir sig á þennan hátt, ég bara tek ekki þátt í þessu.

Svo er hitt og nú hlæja þeir sem þekkja mig. Saumaklúbbar ! Það er nú efni í heila blaðsíðu. Upphaflega líklega hugsað svo konur gætu setið saman við útsaum og prjón og aðstoðað hverja aðra jafnvel eða hreinlega montað sig að hæfni sinni á handavinnusviðinu. Ok gott og vel, ég er enn alveg að skilja samhengið. En hvað eru saumaklúbbar í dag ? Er einhver handavinna í dæminu ? Eru þetta ekki orðnir kjaftaklúbbar frekar með matarívafi þannig að allir geti montast með snilld sína í eldhúsinu ?

Ég hef aldrei á minni æfi farið í saumaklúbb og langar ekki til þess. Enda myndi steinlíða yfir þá sem mig þekkja ef ég tæki upp á svoleiðis.

Vinkona mín var í svona. Allar voða duglegar að mæta. Svo veiktist ein og klúbbkvöldið fór í að tala illa um hana, fjarstadda. Vinkona mín stóð upp og gekk á dyr og er síðan meðlimur í félagi mínu gegn saumaklúbbum.

------------------------------------------------------------------------------------

Svo þegar ég var búin að hugsa þetta allt saman -bíða smástund, greiða mér og rétta úr tásunum þá ákvað ég að hvorugt þessara atriða væru þess virði að ergja sig á þeim. Það er OFF takki á mínu sjónvarpi og ég fer hvorteðer ekkert í saumaklúbb, ég er líka allt of feit til að vera étandi kex

Þannig að úr þessu varð tilgangslausasta færsla dagsins og ég veit enn ekkert hvað ég á að gera á morgun.

Athugasemdir

[Helga Magnúsdóttir, 3.6.2008 kl. 17:48]

Mamma mín var í alveg ferlega skemmtilegum saumaklúbb. Þær voru fimm, allar hver annarri hressari og stóðu saumaklúbbarnir oft þar til 5 og 6 á morgnana. Er almennt á móti saumaklúbbum eins og þú og myndi aldrei ganga í einn slíkan nema þessar hressu konur myndu lifna við og vera í honum líka.

[Linda litla, 3.6.2008 kl. 18:02]

Þú finnur þér örugglega eitthvað skemmtilegt að gera til að eyða deginum. Efast ekkert um það.

Kannski gætir þú stofnað saumaklúbb ?? HA HA HA HA

[Hulla Dan, 3.6.2008 kl. 18:12]

Þessi tilgangslausa færsla þín var a.m.k fynndin og stytti mér stundir á meðan ég eyðilagði kvöldmatinn

[Heiður Þórunn Sverrisdóttir, 3.6.2008 kl. 18:24]

Er sammála Hullu þetta var fyndið og gaman.

[Steinunn Ósk Steinarsdóttir, 3.6.2008 kl. 18:34]

ég held að saumaklúbbar í dag séu aðallega kjaftaklúbbar. Gert til þess að komast aðeins út af heimilinu öðru hvoru.

[Steinunn Ósk Steinarsdóttir, 3.6.2008 kl. 18:35]

en ég hef gert eins og vinkona þín.... yfirgefið saumaklúbb vegna baktals og leiðinda. Fíla ekki svoleiðis.  Hætti að umgangast þann hóp hreinlega.

[Gunnar Helgi Eysteinsson, 3.6.2008 kl. 19:06]

Blogg klúbburinn er mikið skemmtilegri.

[Anna Guðjóns (IP-tala skráð) 3.6.2008 kl. 19:17]

Vil bara láta ykkur vita að enn eru til saumaklúbbar þar sem handavinnan er númer eitt, tvö og þrjú - ekki hnallþórurnar - er í einum slíkum

Anna

[Birna Dis Vilbertsdóttir (IP-tala skráð) 3.6.2008 kl. 19:32]

Ég byrja í prjónaklúbbi í haust.Það er strákur sem stendur fyrir honum.Hittumst og ég alla veganna prjóna.Svo er sungið og allir skemmta sér vel.Konur og kallar.Frábær færsla.LU  KAUPI ÞAÐ EKKI

[Jórunn Sigurbergsdóttir , 3.6.2008 kl. 19:34]

Gott hjá þér. Engu get ég bætt við þetta. Lu aulýsingin er ógeðslega væmin og ég hata þætti eins og t.d örvingla eiginkonur eða hvað hann heitir nú. Desperate Wifes.

[Ásdís Sigurðardóttir, 3.6.2008 kl. 20:00]

Geðveikt skemmtileg færsla hjá þér.  Ég er alveg sömu skoðunar og þú, hef reynt að vera í saumaklúbb, gafst upp, ég vil hafa allt í bland og mér finnast strákar skemmtilegri en stelpur og svo vil ég enga stelpuþætti, ég horfi bara á það sem ég vill.  We rock 

[Ragnheiður , 3.6.2008 kl. 20:14]

Já stelpur , við rokkum !

Anna Guðjóns, það er ágætt að heyra...

Gunnar já miklu betra..

Takk fyrir skemmtileg innlegg

[M, 3.6.2008 kl. 20:21]

Minn saumaklúbbur er orðinn að matarklúbb. Engin handavinna sem er léttir fyrir mig, en leiðist líka þetta matarstútt og alltaf að reyna að finna upp hjólið í hverjum klúbb.

[M, 3.6.2008 kl. 20:22]

matarstúss, átti þetta að vera

[Jenný Anna Baldursdóttir, 3.6.2008 kl. 21:37]

Þetta er misjafnt með klúbbana, en hef aðeins einu sinni verið í saumó eftir að ég varð fullorðin.  Minnir að það hafi verið í lagi og það var af því að ég var ekki með handavinnu, heldur kjaftaði og hló og truflaði allar hinar.

En helvíts gaman var það.

Knús á þig.