Skýrslan um fangelsismál

ég er búin að lesa hana alla og vista afrit á tölvunni minni. Margt sem þar kemur fram er góðra gjalda vert, áherslan nokkur á málefni kvenfanga. Margrét Frímannsdóttir var formaður þessarar nefndar, hún hefur löngum sýnt það að hún er með hjartað á réttum stað. Hennar hef ég saknað úr stjórnmálum. En að skýrslunni, orð eru til alls fyrst. Nú er að sjá hvernig þessum málum vindur fram í framtíðinni. Nokkuð er fjallað um fyrirhugað fangelsi á Hólmsheiði sem mér hefur heyrst undanfarið að sé jafnvel að detta út, í staðinn á að byggja upp fyrir austan. Ok gott og vel. Það þarf að setja miklu meiri kraft í að endurhæfa fangana, það er hagur okkar allra að þeir komi betri til baka. Það eru ekki bara mæður þeirra sem græða á því, samfélagið allt. Þetta fólk er okkar fólk og við getum ekki snúið við því baki. Því miður hefur það oft verið þannig að nefndir eru skipaðar og skýrslum þeirra svo stungið undir stól og ekkert gert meira í málinu. Þessu mun ég fylgjast með þó að minn "fangi" sé látinn. Ég mun koma með minn "óskalista" í þessum málefnum fljótlega.

Að öðru...er einhver lesandi hér sem man eftir bröggunum í Reykjavík ? Á síðu systur minnar(www.siggahilmars.blog.is) er mynd af einum bragganna í Kamp Knox sem var á Kaplaskjólsvegi. Mamma bjó þar. Ég á bækur síðan hún var stelpa og þær eru merktar nafni hennar og heimilisfangi. Hún ólst upp í mikilli fátækt og basli og það hélt áfram fyrstu ár æfi minnar. Hún var samt ótrúlega mögnuð. Hún var þvílík húsmóðir að það sá aldrei blett eða hrukku á neinu. Samt hafði hún verulega fyrir þessu. Það var ekki eins og letiaulinn ég sem þarf bara að fara í herbergi inn af eldhúsinu til að þvo og nenni því stundum ekki fyrr en óhreinatauskarfan er full (toggintau sagði Himmi,enginn veit afhverju) . Í lok þessa mánaðar verða 5 ár síðan krabbinn tók hana mömmu. Greta móðursystir sagði við mig þegar mamma var skilin við, ég skal vera mamma þín. Greta lést í mars, líka úr krabba. Það var vont. Þær voru ótrúlega samrýndar systur. Ég reyndi að skýra samband þeirra þegar ég skrifaði minningargrein um mömmu. Mögnuð kona. Nú lifa bara 2 bræður eftir af börnum Gústu og Árna. Nokkuð af barnabörnum Gústu hafa líka fallið frá. Elsti bróðir mömmu hefur misst 3 börn. Gréta missti dóttur. Börn yngsta bróður mömmu vitum við ekkert um, hann var Breiðavíkurstrákur og er látinn fyrir nokkuð mörgum árum. Það er einungis eitt barna Gústu sem hefur verið farsælt í sínu einkalífi og ekki orðið fyrir stóráföllum. Við hin höfum alltaf horft til hans með nokkru stolti. Þó maður sé alinn upp við vondar aðstæður þá þurfa þær ekkert endilega að fylgja manni. Maður er sjálfur arkitekt að eigin lífi upp að vissu marki. Það er hellingur sem maður getur lagað og breytt.

Nú læt ég þessum fortíðarpælingum lokið, fæ mér kaffi og klúsa Björn. Hann er kominn í frí. Merkilegt annars hvað hann nennir að fá knús, hann verður tvítugur í mars !

Ég var að hugsa í gær. Ég hugsa oftast á miðvikudögum. Ég myndi ekki vilja breyta neinu. Krakkarnir mínir eru nákvæmlega eins og ég vil hafa þau. Það eina sem ég sé í mínu lífi þess virði að breyta því er þetta með Hilmar minn. Ég hefði viljað hafa hann áfram.

Þið krakkar, mamma elskar ykkur eins og þið eruð en það þýðir ekki að ykkur megi ekki farnast betur í lífinu ykkar. Þið eruð best.

Ljósasíðurnar eru í hlekkjum hérna til hægri.

Athugasemdir

[Kristín Katla Árnadóttir, 1.11.2007 kl. 14:24]

Mikið er þetta falleg og sorgleg grein þú ert góð kona elsku Ragnheiður. knús

[Jórunn Sigurbergsdóttir , 1.11.2007 kl. 15:41]

Mikið er það sár að hafa misst svona marga Ragga mín.  Ég votta þér samúð mína.  En hvað' þú ert sterk og vel gerð. Já, erfiðar aðstæður þurfa ekki að fylgja manni alla tíð. Góð grein.

[Jenný Anna Baldursdóttir, 1.11.2007 kl. 15:49]

Þú kemur mér alltaf til að hugsa Ragga mín (þó á fimmtudegi sé). Ég bjó á Hringbraut og man auðvitað eftir Kamp Knox.  Það var skelfilegt fátækrarhverfi og svo var okkur bannað að stytta okkur leið þar í gegn.  Fordómarnir voru skelfilegir.  Ástæðan fyrir því að við máttum ekki fara í gegn um kampinn, var sú að börnin þar voru sögð villingar og að allt væri löðrandi í fyllibyttum.  Hugsaðu þér, fordómana?  Sem betur fer voru allir fluttir úr þessu heilsuspillandi húsnæði um 1963 að ég held.

Takk fyrir mig.

[Jenný Anna Baldursdóttir, 1.11.2007 kl. 15:54]

Gleymdi að segja, að mamma þín hefur verið sterk og öflug kona.

[Ragnheiður , 1.11.2007 kl. 16:01]

Þessir fordómar voru vegna þess að fólk vildi manni vel. Jón móðurbróðir var t.d. notaður sem grýla á mann.

[Kristjana Bjarnadóttir, 1.11.2007 kl. 16:36]

Sæl Ragnheiður og takk fyrir heimsóknir á mína síðu

Ég dáist að þér fyrir hreinskilni og kjark. Það er gríðarlega sterkt þegar kona í þinni stöðu ræðir um málefni fanga og samfélagsins í heild. Ég trúi að þú sért í stöðu til að hafa þau áhrif sem þú vilt.

Okkur er hollt að líta nokkur ár, áratugi aftur í tímann, það veitir okkur sýn á hvað hefur breyst, bæði til hins betra og hins verra. Einnig sýn á hvað hefði átt að breytast en gerði það ekki.

Eigðu góðar stundir.

[Greta Björg Úlfsdóttir, 1.11.2007 kl. 17:32]

Þakka þér fyrir að deila þessu með okkur.

[Guðrún Emilía Guðnadóttir, 1.11.2007 kl. 18:16]

Þú ert stórkostleg og hver segir að þið systur séuð ekki líkar mömmu ykkar. Þú ert allavega hörkukona Ragga mín og ef þú hefðir búið við þessar aðstæður sem móðir þín byrjaði að búa við þá hefðir þú bara gert það með sóma eins og hún.Ég hef sagt það áður, að konur frá þessu tíma ættu að fá fálkaorðuna, það er að segja ef þeim þætti einhver akkur í því. Já ég man eftir braggahverfunum. og ég gekk í skóla með börnum úr einu slíku hverfi, ég bjó í hverfi sem heitir Laugarneshverfi og gekk í Laugarnesskólann eins og þú.
Með mér í skóla voru margir vinir mínir sem bjuggu í Höfðaborg og í braggahverfinu fyrir ofan suðurlandsbraut ég man ekki hvað það hét.
Man aldrei eftir því að mér hafi verið bannað að vera með þessum krökkum. Aldrei var ég heldur vör við sóðaskap, en ég var vör við yfirgengilega fátækt. Manni þótti það eigi gott er sum börnin í skólanum voru ekki með nesti. Ragga mín, hvað eru vondar aðstæður
og hvað er að vera farsæll í sínu lífi og hafa góðan front fyrir umheiminn. Ég gef ekki mikið fyrir það.
Kærleikur, virðing og traust, ef það er ekki þá er ekkert.
Ragga mín auðvitað elskum við börnin okkar eins og þau eru,
en við skulum líka þakka Guði fyrir þann þroska sem okkur hefur hlotnast með árunum til að geta það.
Ég er nú talin afar stjórnsöm, en ég segi alltaf við þau, þetta er ykkar líf, gerið það sem þið viljið, en ef þið spyrjið mig ráða þá tek ég mér það leifi að svara ykkur eftir mínu höfði.
En ég elska þau útyfir allar víddir.
kærleikskveðjur til þín  Ragga mín.
                 Þín Milla.

[Ásdís Sigurðardóttir, 1.11.2007 kl. 18:28]

Vel skrifuð grein elsku Ragga.  Mér líður eiginlega eins og ég hafi alist upp í öðru landi. Yngst 3ja systra. Höfðum allt til alls og aldrei svöng. Fannst þó oft pabbi og mamma ströng og leiðinleg, en það var þeirra aðferð til að gera úr okkur góðar manneskjur. Við fengum ekki nándar nærri eins mikið og aðrir jafnaldrar okkar því peningum var ekki sóað, heldur var okkur kennd sparsemi, nægjusemi og hlýja. Það hefur verið gott veganesti og mér hefur tekist vel  í að taka á því sem lífið hefur boðið uppá. Dáist að þér og þínum og mamma þín hefur greinilega verið hetja.

[Ásthildur Cesil Þórðardóttir, 1.11.2007 kl. 20:21]

Góð hugvekja Ragnheiður mín.  Ég ætla líka að skoða þessa skýrslu, var að lesa hjá Margréti Hafsteins um ráðstefnu sem hún tók þátt í, mjög góð lesning.  Hef vistað hana hjá mér, og ætla að lesa betur þegar mér gefst betra tóm.

[kidda, 1.11.2007 kl. 21:03]

Gott að hafa fasta daga til að hugsa Í þessarri góðu færslu hnaut ég um að sumar kölluðu sig Letiaula. Ég er líka svona letiauli en er viss um að ef við hefðum verið í sömu sporum og hún mamma þín, þá hef ég þá trú að við hefðum verið verið mun duglegri en við erum í dag. Næðum kannski ekki hennar dugnaði, en færum kannski langt í það.

Knús og klús

[Ragnheiður , 1.11.2007 kl. 21:17]

hehe maður er þá ekkert að hugsa hina dagana. Tek bara einn dag í það

[Steinvör (IP-tala skráð) 2.11.2007 kl. 00:48]

Sæl, mjög falleg minningargreinin sem þú skrifaðir og falleg kona hún mamma þín. Sá að hún var fædd 17. júlí en mín uppáhaldsfrænka og vinkona á afmæli þann dag. Greinilega gott fólk fætt þann dag. 

Mjög góð  baráttan þín vegna fangelsismálanna. Go girl ! Ekki veitir af fólki eins og þér í þá baráttu.

(((()))) Steinvör

[Ragnheiður , 2.11.2007 kl. 01:05]

Takk fyrir Steinvör.

[kidda, 2.11.2007 kl. 11:52]

Hvar fannstu skýrsluna ?

Knús og klús