Bloggfærslur mánaðarins, nóvember 2008

30 nóvember 2002

Við erum stödd á líknardeildinni í Kópavogi. Ég man að ég er ferlega syfjuð, var á næturvakt. Ég sofna smástund í pabbabóli þarna og vakna við að pabbi breiðir ofan á mig peysuna sína. Hann vill ekki að mér verði kalt. Gréta frænka stendur við fótagaflinn á mömmu rúmi og er að rifja upp gamlar minningar síðan þær voru stelpur.

Við dáumst að minni hennar og hún segir líka svo skemmtilega frá. Mamma er hins vegar rænulaus, þannig hefur hún verið síðan eftir hádegi daginn áður. Þá kom Halli Pétur, fyrrum tengdasonur, hún brosti til hans, síðasta brosið, og svo sofnaði hún. Það er komið síðdegi, það er orðið dimmt úti og fallega díóðuljósið í runnanum utan við gluggann hennar mömmu er svo fallegt. Mamma hefur oft haft orð á því.

Sigga situr öðru megin við mömmu en pabbi hinu megin. Þau halda í hendurnar hennar. Án nokkurs fyrirvara þá fer hún, hún hættir einfaldlega að draga andann.

Móðir mín er látin.

°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°

Á eftir fer ég til Hauks frænda, hann ætlar að hitta sitt fólk núna, viku eftir afmælið hans.

Til að gleðja ykkur í upphafi aðventunnar þá ætla ég að birta mynd sem ég stal, án samviskubits, af henni dóttur minni. Myndefnið er Hilmar Reynir, alltaf flottastur alltaf sætastur.

Við Bjössi skellihlógum að myndinni áðan og hann minnir þarna óþyrmilega á prakkarann, pabba sinn.

Hilmarmódel


Brandaramús

er enn með undanbrögð, hún er lokuð inni í húsi hjá mér og kemst ekki út -greyið. Lætur ekki plata sig í gildru en ég á eftir að skipta um agn í gildrunni.

Lappa þótti skörin vera farin að færast heldur upp í bekkinn þegar mýsla gerði sig heimakomna í bælinu hans. Hann smalaði henni þaðan, eftir ganginum og undir eldhúsinnréttinguna, stórmóðgaður alveg . Mýslan skoppaði eftir gólfinu með skottið upp í loftið.

Ég hef eiginlega ekkert að segja.....

Helga átti afmæli í gær, til hamingju með daginn skvís...ætlaði að setja þetta inn í gær en var voðalega upptekin og komst ekki í tölvuna af neinu viti.


Vei

oss óstöðugum og illa einbeittum.

Ég er að reyna að hanga vakandi yfir alþingi en nú get ég ekki hangið lengur, ætlaði að sjá afdrif frumvarpsins sem Vilhjálmur segir voðalegt en Lilja segir ágætt. Gjaldeyrishaftafrumvarpið.

Svo er að sjá hvort "músavinirnir" tveir verði búnir að handsama mús á morgun...gat ekki keypt gildru sem drepur greyið. Þessi músavinur er nokkurskonar rör sem mýsla lokast inn í, svo er hægt að sturta henni úr úti og sjá hvor okkar verður á undan inn aftur Tounge

Farin að sofa...góða drauma, helst um mýs.


Afmæli (og áríðandi viðbót)

Ég á afmæli í dag

Ég á afmæli í dag

Ég á afmæli, sjálfur

Ég á afmæli í dag

 

hilmartígrisdýr

Elsku kallinn hennar ömmusinnar....klús og til hamingju með eins árs afmælið ´

Hérna vil ég koma að ósk um fyrirbænir, góðar hugsanir og hlýhug. Góð og yndisleg bloggvinkona mín er lasin þessa dagana. Sjá hérna


Enn litið í aldarspegilinn

Þessi klausa fjallar um einhverja alöflugustu kvenréttindakonu sem ratað hefur á síður Morgunblaðsins. Til að það sé á hreinu þá rita ég upp klausuna eins og hún birtist, reyni að halda stafsetningu réttri og blanda mínum skoðunum ekki inn í klausuna.

Frú Pankhurst orðin þingmaður ?

Eins og kunnugt er hafa brezkar konur nú fengið kosningarétt og kjörgengi ,og við þingkosningar þær , sem nú eri nýlega , voru margar konur í kjöri.

Meðal þeirra var Miss Pankhurst, fyrverandi foringi kvenvarga. Hún var þingmannsefni fyrir Smethwick og segir ,,Times" daginn áður en kosningar fóru fram að það séu miklar líkur til þess að hún komist á þing. Hún er fylgismaður stjórnarinnar og þegar hún hafði afráðið að gefa sig fram í Smethwick, voru þar tvö þingmannsefni fyrir og annað úr stjórnarflokknum. En að áskorun stjórnarflokksins dró sá maður sig í hlé fyrir Miss Pankhurst og má bezt á því sjá hvert traust hún hefir haft í flokknum.

Að vísu hefir hin fyrri framkoma hennar nokkuð dregið úr fylginu og á fundum var henni hvað eftir annað núið því um nasir að hún hefði brotið glugga og brent kirkjur. En liðni tíminn gleymist furðu fljótt og nú á Miss Pankhurst líklega sæti í brezka þinginu og mundi fáa hafa órað fyrir því fyrir nokkrum árum, þegar kvenvargarnir létu sem verst í Englandi


28 nóvember 1918

Plágan er nú mikið á undanhaldi en þessa klausu rakst ég á.

 BARNAHÆLIÐ

Í fyrradag dó þar stúlkubarn Kristjáns Hall bakara, sama daginn og foreldrar þess og fóstra voru greftruð. Dag og nótt hafði föðursystir barnsins, frú Anna Ásmundsdóttir,verið við rúm þess og hjúkrað því, en það kom fyrir ekki. Dauðinn sigraði og það fylgir nú foreldrunum í gröfina.

Annars líður börnunum yfirleitt vel. Langflest eru hress og eru að leikjum í einni stofunni. Þau eru kát og una sér vel hjá því ágætisfólki sem gætir þeirra.

ÞAÐ VANTAR FÖT

Þegar vér í gær komum í Barnaskólann og spurðum hvort nokkuð vantaði, var oss svarað því að það vantaði tilfinnanlega föt handa börnunum. Vér vorum sérstaklega beðnir að útvega hjá lesendum Morgunblaðsins ,sem aldrei láta bregðast að verða við slíkum beiðnum vorum. peysur. Það vantar utanyfirpeysur á 2-6 ára börn. Þær mega vera notaðar. Sendið þær á Barnahælið í dag. - Þá vantar og kjóla á ársgömul börn, svuntur af öllum stærðum fyrir börn.

Vér trúum ekki öðru en að lesendur sjái umhirðulausu börnunum fyrir þessum smámunum.

29 nóvember er þessi grein í Morgunblaðinu.

Barnahælið

Það stóð ekki á lesendum Morgunblaðsins með að sjá fátæku börnunum í Barnaskólanum fyrir fötum. Í gærmorgun flutti P.J. Thorsteinsson stórkaupmaður oss 500 krónur frá hlutafélaginu Bræðingur og tók það fram að það ætti að vera til fata handa börnunum. Daniel Bernhöft bakarameistari sendi 100 kr,. frú J. Fossberg 25 kr., Verslunin Breiðablik 100 kr., Zophónías Baldvinsson 100 kr., Ungfrú Snorra Benediktsdóttir 25 kr. Samtals nema þessar gjafir kr. 850.00. Munum vér í dag afhenda réttum hlutaðeigendum upphæðina til að hægt sé að kaupa ný föt handa börnunum þegar í stað.

Þau þurfa öll undantekningarlaust að fá ný hlý nærföt, helst tvent af hverju , og að minsta kosti þrenn pör af sokkum. Ný utanyfirföt þurfa þau öll og þá ekki síst sterk og góð stígvél, helzt vatnsleðurstígvél og auk þess klossa og inniskó. Reykvíkingar ættu að sjá svo um að öll börnin geti horfið aftur heim úr Barnaskólanum ,þegar að því kemur, vel fötuð,hrein, feit og ánægð. Hugsið ykkur , kæru lesendur, öll glöðu andlitin sem koma aftur þeim til föður og móður, þau sem svo hamingjusöm eru að eiga foreldra og hin til ættingjanna. Hugsið ykkur hve glöð og ánægð þau verða yfir nýju fötunum, nýju skónum eða stígvélunum og öllu því sem þau hafa fengið á hælinu. Og hugsið ykkur hversu miklu betur þessum olnbogabörnum bæjarfélagsins líður er þau eru í hreinum, hlýjum nærfötum, í sterkum utanyfirfötum og kanske í góðri kápu utan yfir?

Fyrir þessar 850 krónur er hægt að kaupa mikið handa börnunum. Það má ganga að því vísu að sá kaupmaður sem verzlað verður við, setji lægra verð á varninginn ef fram á það verður farið.

Í Barnahælinu er nú glatt á hjalla á hverjum degi meðal hressu barnanna. Rugguhesturinn, sem David Copland gaf, stendur þar á miðju gólfi og börnin skiftast á um að ,,fá sér sprett". Samkomulagið er ekki alt af gott um það hver eigi nú að stíga á bak folanum, en það er ætíð jafnað með hægð af þeim konum og stúlkum sem gæta barnanna. Myndabækur, brúður, tindátar og alls konar leikföng eru í ríkum mæli og eykur mjög á velveruna. Þar er lítill strákur einn, um 4 ára, laglegur og efnilegur. Hann kallar John Fenger ,,pabba" er alt af síbrosandi og sækir það fast stundum að koma á bak klárnum. Hann er afskaplega stoltur af nýjum inniskóm sem honum voru gefnir nýlega. Sko ! segir hann og lyftir upp fætinum. Skórnir eru marglitir, með loðkanti, og stráksi hefir ekki augun af þeim. Svona eru mörg dæmi. Lítil telpa fékk nýja svuntu. Hún stóð lengi úti í horni og horfði niður á svuntuna. Hún hafði aldrei séð nokkurn hlut jafn fagran.

Það er ánægja að koma í Barnaskólann. Þeir sem þangað komu fyrsta daginn og sáu hvernig börnin sum litu út, er þau voru flutt á hælið og koma þangað nú, þeir sjá svo mikinn mun á börnunum að undrum sætir.

Því fólki sem int hefir af hendi þetta mikla líknarstarf fyrir börnin verður aldrei nógsamlega þakkað starfið


Ég hef eignast nýtt gæludýr

og það er vonandi ekki af norskum ættum eins og ákveðinn skógarköttur. Kelmundur knúsibolla kjaftaði frá nýja dýrinu í morgun og er enn önnum kafinn við að hafa upp á því. Hann missti meira að segja af skemmtilega verkefninu sínu, að vekja Bjössa, vegna þessa mikla veiðiáhuga.

Nýja gæludýrið er mús.

 


17 nóvember 1918

Hérna kemur meiri aldaspegill. Dagsetningin er í fyrirsögninni.

Árið sem nú er að líða mun lengi í minnum haft sem ár friðarins. Óskin sem allar þjóðir heimins hafa vorið fyrir brjósti hefir gengið eftir. Sverðin eru slíðruð á vígvelli Evrópu.

Hver hefði spáð því að svo mikil tíðindi gerðust hér á meðan vor að menn minntust naumast á vopnehléið, byltinguna þýsku og landflótta þess þjóðhöfðingja sem mest hefir verið um rætt síðustu árin, þeirra vegna ? Hver hefði spáð því að svo viðburðaríkir dagar biðu vor að vér gleymdum Kötlu, spúandi eldi og eimyrju yfir nálægar sveitir ?

Nú nefnir enginn Reykvíkingur Kötlu fremur en hún hefði aldrei verið til. Og engir fánar svifu að hún á þriðjudaginn var , til þess að fagna friðnum. Í stað þess drúptu fánar á miðri stöng sem sýnilegt tákn drepsóttarinnar sem dauðinn hefir fengið að vopni, í okkar afskekkta landi.

Utan úr heimi hafa borist öðru hvoru síðan í sumar fregnir af inflúensunni sem geisað hefur víðsvegar um Evrópu og nú upp á síðkastin einnig vestan hafs. En það virðist sem svo að menn hefi eigi álitið veikina jafnskæða og raun er á orðin. Inflúensan sem menn hafa átt að venjast síðustu árin hefir talið hana lítið verri en slæmt kvef.

Og það virðist mega ætla að læknar vorir sumir hafi eigi álitið að veruleg hætta gæti stafað af henni því að annars mætti það heita ófyrirgefanlegt skeytingarleysi að hafa eigi betri viðbúnað undir komu hennar hingað en gert var eða gera eigi ráðstafanir til að tefja svo fyrir veikinni að mikill meiri hluti bæjarbúa sýktist ekki samtímis og vandræðin þar af leiðandi yrði óviðráðanleg.

Á miðvikudaginn annan en var má telja að þriðjungur bæjarbúa hafi verið orðinn veikur . En næstu dagana breiddist veikin svo mjög út að um síðustu helgi mun ýkjulaust mega telja að tæpur þriðjungur hafi verið á uppréttum fótum. Því dagana var því líkast sem alt líf væru að fjara út í bænum. Goturnar voru að kalla mátti auðar af fólki og ætíð voru það sömu andlitin sem sáust, flest eldra fólk. Í byrjun þessarar viku fóru að sjást ný andlit, sjúklingar sem gengnir voru úr greipum sóttarinnar. En um sama leyti fór hinn hryggilegi förunautar influensunnar, lungnabólgan, að færast í aukana ogmeð henni fjölgaði mannslátunum  

LOKAÐ

Um það leyti sem Morgunblaðið hætti að koma út, var mjög tekið að brydda á því að sölubúðir væru lokaðar allan daginn, og margar lokaðar öðruhvoru vegna þess að eigi var nema einn maður uppistandandi í hverri búð. Og smám saman lokuðu búðirnar fleiri og fleiri. Stór verslunarhús, eins og t.d. Vöruhúsið, hafa verið lokuð í meira en viku. Bakaríin urðu að loka flestöll því bakararnir lágu veikir og ekkert var til að selja. Þó hafa bakarí Vald.Petersen á LAugavegi 42, frú Kristínar Símonarson og Alþýðubrauðgerðin getað selt brauð daglega, eftir því sem vér vitum best. Og mjólkursölustaðirnir hafa ætíð getað afgreitt mjólka í bæinn enda hefðu þeir síst af öllu mátt missa sig.

Síðastliðinn laugardag var, að því er komist næst, ekki fimta hver sölubúð í bænum opin. Og þar sem opið var ,var alls eigi mikið að gera, jafnvel í matarverslununum.

Afgreiðslutími bankanna var styttur að miklum mun. Þar hefir síðastliðna viku aðeins verið opið  1 til 3 og býsna fáliðað. Í Íslandsbanka hafa t.d. suma dagana aðeins 3 menn verið við afgreiðslu , þar á meðal sá bankastjórinn sem nú er heima en í Landsbankanum hafa alltaf verið nokkru fleiri. Stjórnarráðið hefir verið lokað suma dagana og flestar eða allar opinberar skrifstofur. Afgreiðslutími póststofunnar var styttur að miklum mun og sú stofnun sem mest var um vert að opin héldist, landssíminn, varð einnig að leggja árar í bát. Um miðja fyrri viku varð að hætta afgreiðslu símasamtala út á land, og skömmu síðar var einnig hætt að afgreiða símskeyti. Verst var ástandið á laugardaginn var því að þá muni eigi nema einn maður af öllu starfsfólki landssímastöðvarinnar hafa verið uppi standandi en daginn eftir voru einn eða tveir komnir í viðbót. Miðstöðinni mun altaf hafa verið haldið opinni nema part úr einum degi en þjónustutíminn var styttur vegna þess að sömu stúlkurnar, eða sama stúlkan, urðu að vera á stöðinni allan daginn. Sendisveinaleysi hefir mjög bagað landssímastöðina og eigi verið hægt að senda út um bæinn skeyti þau sem tekið hefir verið á móti. Loftskeytastöðin hefir starfað að mestu og hefir þó forstjórinn verið veikur en þó daglega að kalla má náð merkustu blaðaskeytum.

Venjuleg störf bæjarbúa hafa legið í kaldakoli. Flestir rúmfastir, en þeir sem uppi stóðu, mátu meir- sem betur fer- að sleppa niður atvinnu sinni til þess að vinna það sem mest lá á, að hjúkra og hlynna að heimilinum - bæði ríkum og fátækum- sem ekki áttu neina heilbrigða hönd.

HJÁLPARVANA

Það reyndust fleiri dyr lokaðar en dyr sölubúðanna. Þeir sem á fótum voru fóru, er á leið vikuna, að taka eftir því undarlega fyrirbrigði að dyr íbúðarhúsa hér og hvar um bæinn voru harðlæstar um hábjartan daginn. Og það kom þá í ljós að í einstaka húsum var engin manneskja uppistandandi, allir veikir, og enginn sem gat hjálpað. Sömuleiðis gaf að líta sjúka foreldra og óvita börn svöng í rúminu, en enga manneskju til að hjúkra eða færa björg. Svo mögnuð var sóttin orðin og útbreidd. Og engir kunningjar komu að vitja, því þeir voru líka veikir.

HJÚKRUNARNEFNDIN

Fyrir forgöngu Lárusar H. Bjarnason komst hún á laggirnar 8 þ.mán. og tók þegar að starfa undir stjórn hans. Verkefnið var mikið en mannaflinn sem hún fékk til umráða að sama skapi ónógur. Þó náðist strax til nokkuð margra manna, er þegar voru gerðir út til þess að ganga á milli húsa og veita hjálp þar sem þörfin var brýnust. Það er eigi of mælt að þessi tilstofnun hafi bjargað mörgum mannslífum , margir hafa fengið hjúkrun og bata sem ella hefðu orðið herfang dauðans vegna ónógrar eað engrar aðhlynningar. Og nú var fengin stofnun, er fólk sem einhvern hafði að senda,gat snúið sér til og fengið hjálp. Margir hefðu áreiðanlega farið á mis við læknishjálp og meðul, mat og hjúkrun, ef eigi hefði verið komið skipulagi á að veita fyrst hjálpina þar sem hennar var brýnast þörf án tillits til alls annars.

Á hjúkrunarskrifstofunni var lækni að hitta nætur og daga, peningahjálp veitt fátækum til meðalakaupa og annarra brýnustu nauðsynja. Skrifstofan sá einnig um flutning sjúkra á spítalana og hefir látið útbýta sjúkrafæðu ókeypis á tveim stöðum í bænum. Eins og geta má nærri hafa býsna miklir örðugleikar verið á því að veita alla þá hjálp sem um hefir verið beðið. Kvenfólk vantar tilfinnanlega, eins og ræður að líkindum, þegar hjúkrunarstarfsemin á í hlut.

VESLINGS LÆKNARNIR

Flestir munu víst þykjast átt hafa örðuga daga undanfarið hvort sem sjúkir hafi verið eða heilbrigðir. En þó munu tæplega fáir hafa verið eins hart leiknir og læknarnir sem sóttin beit ekki á.

Þeir Matthías Einarsson og Þórður Thoroddsen munu alta hafa haft ferlivist meðan sóttin var sem skæðust. Sömuleiðis landlæknirinn og Guðmundur Hannesson prófessor. Hinir hafa allir legið fremur stutt-sumir ekki í nema 1-3 daga- að undanteknum þeim Halldóri Hansen, Stefáni Jónssyni og Jóni Kristjánssyni sem allir voru þungt haldnir og Jóni héraðslækni og Kpnráð Konráðssyni.

Það ræður að líkindum hve gífurlegt erfiði læknanna hefir verið þessa dagana. Þó að eigi sé gert ráð fyrir að meira en tuttugasti hver sjúklingur hafi notið læknishjálpar daglega að meðaltali- en það mun vafalaust oflágt reiknað- þá verða samt læknisvitjanirnar samt 500 á dag ef rétt er sem fullyrt er að tveir þriðjuhlutar bæjarbúa hafi legið samtímis. Það gæfi ranga hugmynd um störf læknanna að sefja að þeir hafi unnið frá morgni til kvelds. Nei, þeir hafa hamast frá morgni fram á miðjar nætur. Vér höfum t.d. góðar heimildir fyrir því að Matthías Einarsson hefir venjulega verið á þönum frá kl 7 á morgnanna til kl. 2 á nóttunni og stundum lengur og má það heita þrekvirki. Maggi Magnús hefir verið næturlæknir Hjúkrunarskrifstofunnar en jafnan verið og í sjúkravitjunum mesta hluta sagsins.

Hjúkrunarnefndin hefir oftast getað lagt læknunum til bifreiðarog hefir sú ráðstöfun mjög flýtt fyrir þeim. Yfirleitt hafa bifreiðarnar verið hinar þörfustu og er t.d. sennilegt að margt fólk hefði alls ekki komist á sjúkrahús ef þeirra hefði ekki notið við.

SJÚKRAHÚSIN

Í upphafi sóttarplágunnar tók bæjarstjórnin hálfan franska spítalann á leigu til að leggja þar inn fólk sem sýktist af lungnabólgu. Stóð þá til að verja Landakotsspítalann sýkinni en það mistókst vegna óhlýðni sjúklings eins á spítalanum sem orðinn var rólfær og fór út í bæ og flutti veikina. Var þá rýmt svo til á spítalanum að hægt var að flytja þangað marga sjúklinga. En þessar ráðstafanir urðu þó hvergi nærri fullnægjandi. Víðsvegar um bæinn var enn fjöldi fólks sem nauðsynlega þurfti að komast á sjúkrahús og alltaf bættist við. Tók hjúkrunarnefndin þá suðurálmu barnaskólans fyrir sjúkrahæli og voru flutt þangað rúm og annar útbúnaður. Lengst stóð á því að fá þangað fólk til að hjúkra en það tókst að lokum. Í fyrrakvöld var búið að flytja þangað 53 lungnabólgusjúklinga og eflaust hefir eitthvað bæst við í gær. Flestir sjúklingarnir sem í barnaskólann hafa verið fluttir voru mjög veikir og í mjög mikilli lífshættu. En mjög margir hafa fengið svo mikinn bata að þeir meiga teljast úr allri hættu.

Þórður Sveinsson læknir hefir verið yfirlæknir í barnaskólanum og notað aðallega þá lækningaraðferð að baða sjúklingana úr heitu vatni og láta þá drekka heitt vatn. Síðan hafa þeir verið dúðaðir í ullardúkum og látnir svitna. Engin meðul eða sáralítl hafa verið notuð. Hefir þessi aðferð reynst mjög vel enda sögð mikið notuð vestan  hafs aðallega í byrjun veikinnar til að draga úr henni. Ættu þeir sem enn eiga eftir að leggjast í inflúensunni að hafa þetta ráð og sjá hversu gefst.

Lyfjabúðin

Því er auðsvarað hvar umferðin hafi verið mest, sóttardaganna. Mikið höfðu læknarnir að gera. En meðul þurftu eigi að eins þeir sem lækna var vitjað til heldur einnig allir hinir lítið veiku. Meðalatrúin er svo mögnuð og vaninn sá að brúka meðul svo ríkur að eigi þarf nema lítll lasleika til þess að fólk vilji hafa meðul við honum.

Strax í byrjun fyrri viku var aðsóknin orðin svo mikil að lyfjabúin var troðfull út úr dyrum af meðalagestum. Framan af vikunni var mest beðið um hitalyf og hóstasaft og þraut brátt allt kínin sem lyfjabúðin hafði. En þegar á leið vikuna tóku lyfseðlar fyrir lungnabólgumeðulum að streyma inn og voru engin meðul afgreidd eftir seðli í marga daga, önnur en lungnabólgumeðöl, aðallega kamfórublanda. Margir lyfseðlar urðu eigi afgreiddir vegna þess að efni í lyfin þrutu og nú sem stendur vantar í lyfjabúðina algjörlega mörg nauðsynleg lyfjaefni.

Starfsfólk lyfjabúðarinnar veiktist snemma og lyfsalinn sjálfur veiktist um síðustu helgi. Var óvant fólk fengið til afgreiðslunnar og gekk hún eigi eins greiðlega og ella og einnig spillti það nokkuð fyrir að margt af þessu hjálparfólki var danskt og gekk eigi sem best að skilja suma meðalagesti eða gera sig skiljanlega.

Mest bagaði þó skortur á fólki sem gat blandað lyf eftir seðlum því lyfjafræðingarnir voru nálega allir veikir. Vpru læknanemar af háskólanum fengnir til þess starfa en svo seint gekk afgreiðslan samt að oft þurfti fólk að bíða eftir áríðandi lyfjum í heilan sólarhring.

Auðvitað hefir lyfjabúðin verið opin allar nætur.

°°°°°°°°°°°°°°°°°°°°°°°°°°°°°°°°°°°°°°°°°

Afsakið innsláttarvillur- ég er að horfa á borgarafundinn. Hann er bráðgóður.

 

 

 


12 október 1918

Tíðindalítið hefur verið í höfuðstaðnum undanfarið en ein og ein frétt hefur stungið í augu. Þjófnaðir eru farnir að aukast, póstpoka var stolið af strandferðaskipinu Sterling. Hann finnst nokkru síðar upp i á Skólavörðuholti. Þar er engin byggð enn sem komið er.

Bæjarbúar eru heldur ergilegir yfir kaffileysinu og kenna því um að erlendum skipsáhöfnum hafi verið leyft að kaupa kaffi að vild og þar með hafi kaffið klárast í bænum.

Barn þvælist fyrir bifreið og er flutt í snatri í sjúkrahús, því verður ekki meint af fyrir utan marbletti og smáskrámur.

Ansi margar bifreiðar eru þegar komnar til bæjarins og hamlar þeim öðruhvoru bensínleysi þegar langt líður milli skipaferða. Skipin tefjast stundum ansi lengi þegar þeim er snúið til breskra hafna til skoðunar. Stundum er hluti farmsins gerður upptækur og skipið sent til Íslands með hluta þess sem pantað hafði verið að utan.

En sífellt koma fleiri bifreiðar. Leiðarahöfundur spyr snemma árs 1918 : Hvernig endar allt þetta bifreiðafargan ?! Nú væri gaman að kippa honum upp á jörð og sýna honum bifreiðarnar 2008. Sá yrði aldeilis bit.

Rollur eru til vandræða haustið 1918. Þeim er beitt í Hólavalla kirkjugarði og einn forsjáll bæjarbúi hefur hnýtt geiturnar sínar tvær vestast í garðinum svo þær hefðu eitthvað að næra sig á.

Sumarið hefur brugðist að miklu leyti úti á landi, heyskapur farist fyrir og slæmt árferði. Snemma í september gerði vond veður og fennti fé í stórum stíl, menn urðu úti og aflýsa varð víða réttum þar sem fjallleiðir voru kolófærar.

Fólki hryllir við, veturinn boðar ekki gott. En enn vita þeir ekki hver plágan er á leiðinni.

Katla er farin að gjósa, gosið hefst 12 október 1918. Menn þora ekki að nota símann vegna rafleiðninnar í loftinu.

En .....Botnía er á leiðinni.

°°°°°°°°°°°°°°

til fróðleiks leit ég hér í aldaspegilinn. Ég er komin í stellingar til að hlusta á þingmenn í dag.

 


Í dag hefur verið

hátíðisdagur í lífi ungs manns, hans elskulega uppáhaldsfrænda míns, Hauks Atla. Í dag á hann afmæli og í dag fékk hann ökuskírteinið sitt. Hann kom hér stökkvandi áðan og fékk hraðknús hjá frænku sinni, hann var auðvitað á hraðferð. Leiðin lá til Grindavíkur að horfa á dagvaktina, hann reif með sér frændann sinn sem hér býr.

003

Hérna er kappinn, í einhverri veislu hjá frænku sinni. Langflottastur ! Til hamingju með daginn þinn elsku Haukurinn minn.

Sumum þótti ræðan í messunni í morgun heldur beinskeytt og pólitísk, ég sé að sr. Bjarni er búinn að setja hana inn á vef þeirra hjóna og hér kemur ræðan . Mér fannst ræðan góð og vakti upp hugsanir. Þannig finnst mér þetta eiga að vera.

Ég er enn ekki í nokkru stuði til eins eða neins og er svo dauðleið á þessu vesæla ástandi. En ...ég lifi enn í voninni um að það lagist.

Góða nótt


Næsta síða »

Innskráning

Ath. Vinsamlegast kveikið á Javascript til að hefja innskráningu.

Hafðu samband